Deputeti i Partisë Demokratike, Oerd Bylykbashi i ftuar në emisionin “Të Paekspozuarit” në MCN TV, ka folur për zgjedhjet e pjesshme lokale, konkretisht për ato të Durrësit, ku do të kandidojë Ardian Muka, si kandidat i “Shtëpisë së Lirisë”.
Bylykbashi tha se Muka është kandidati më i mirë që ka patur PD në Durrës, ndërsa shpjegoi edhe si kandidatura e Grida Dumës në vitin 2015 ishte e imponuar nga Lulzim Basha dhe jo një dëshirë e anëtarësisë, çka solli humbje mjaft të rëndë.
“Zoti Ardian Muka është një kandidat që për herë të parë PD pati mundësinë ta nxjerrë me votën e saj. Një nga elementet e rëndësishme që futëm për të demokratizuar partinë, ishte vendosja e primareve.
Zoti Muka është përzgjedhur nga vota e qytetarëve me një mazhorancë të gjerë.
Në të shkuarën zoti Basha ka imponuar kandidatët, në momentin e fundit, duke i çuditur të gjithë. Ishte vendimarrje që nuk pati lidhje me konsultat e bëra me anëtarësinë, thjesht donte të kishte atë kandidate (Grida Dumën).
Durrsakët duket qenë të zgjuar, e treguan me votë. Ne patëm një humbje të rëndë, me 13 mijë vota. Nuk kishte ndodhur të kishim atë humbje. U perceptua nga partia si zgjedhje e Bashës.
Ndërsa zoti Muka është zgjedhje e anëtarëve. Muka është kandidatura më e mirë që ka patur PD dhe opozita. Aleatët e kanë bërë të qartë që mbështesin zotin Muka”, tha Bylykbashi.
Bylykbashi foli edhe për Vangjush Dakon dhe rolin e tij në zgjedhje.
“Vangjush Dako ka qenë rreshteri i Edi Ramës në Durrës. Mund të ketë qenë i zoti për të fituar zgjedhje me shitblerje të votës dhe përdorimin e shtetit, në koalicion me krimin. Të gjithë aspektet, pra të gjithë piktura që krijuat, janë arsyeja përse qytetarët duan ndryshimin e Durrësit.
Dako ka patur pjesën me të gjatë dhe më shkatërruese për qytetin, por jo thjesht me vendime të gabuara sepse ashtu mendonte, por të qëllimshme për ta degraduar qytetin. Ardian Muka është antipodi i kësaj figure. Është një çun Durrsak”, tha ndër të tjera Bylykbashi.
