Zhoze Murinjo ka ndryshuar brenda pak muajsh në 180 gradë mendimin e tij për Marash Kumbullën. Nëse në fillimin e sezonit e shihte si një lojtar pa eksperiencë, i cili ishte larg kërkesave të një skuadre si Roma, tani tekniku portugez nuk resht së lëvduari mbrojtësin e përfaqësueses shqiptare.
Pas barazimit 2-2 ndaj Sasuolos, trajneri ka bërë komplimentet e radhës për skuadrën e tij që reagoi dhe siguroi një pikë me një gol në shtesë.
“Stabilitet në mbrojtje? Dhjetë minutat përfundimtare në superioritet numerik nuk janë të mjaftueshme për të ndryshuar statistikat. Të vijmë këtu dhe të bëjmë thuajse 50% mbajtje topi nuk është e lehtë. Kjo do të thotë se aty mbrapa kemi pasur më shumë stabilitet. Në thelb falë Kumbullës që na ka dhënë më shumë cilësi në daljet para.
Në pjesën e parë të ndeshjes na kanë munguar rregulli, disiplina dhe pikat e referimit. Sa herë që topi mbërrinte në krahë, kishte pak opsione për të luajtur në qendër dhe kërkohej gjithmonë thellësia. Në pjesën e fundit të ndeshjes u përmirësuam, edhe kur ishim 11 kundër 11. Kjo pikë është e merituar. Ka mërzi pasi vinim këtu për të fituar, por është një pikë që ia shtojmë të tjerave, të shohim në fund se sa do të kemi”, tha Murinjo pas përfundimit të duelit.
