Deputetja demokrate Ina Zhupa, në një lidhje “Skype” me studion e Fax News, ka folur për inspektimet që Komisioni Hetimor parlamentar ka kryer në 3 qytete të ndryshme për të parë nëse inceneratorët ishin vënë në punë apo jo.
Sipas Zhupës, në asnjërin prej qyteteve si Fieri, Elbasani apo Tirana nuk kryhej djegie e mbetjeve dhe madje në rastin e kryeqytetit, nuk kishte asnjë lloj godine që të shërbente si incerenator.
Ajo shtoi se në katër vite ishin dhënë 35 milionë euro për një incenerator që nuk ekziston.
“Komisioni është duke vazhduar punën e hetimit të kësaj afere, ku bëhet fjalë për 3 inceneratorë, të Fierit, Elbasanit dhe atë të Tiranës. Ne do të vazhdojmë të hënën me marrjen në pyetje të dëshmiratëve që kemi thirrur që janë nga administratorët aktualë, ne kishim kërkuar edhe pronarët, por ata janë në kërkim ndërkombëtar. Do të vazhdojmë të thërrasim në komision kryetarët e bashkive, ministra dhe vetë kryeministrin Edi Rama.
Në të vizitat tona në të treja inceneratorët, në Tiranë është edhe më e dukshme, por vumë re se në rastin e Fierit ka vetëm një godinë dhe nuk kryhet asnjë djegie. Në rastin e Elbasanit ka një godinë dhe supozohet se duhet të ishin në procesin që kryhej degie dhe prodhohej energji. Por nuk patëm mundësi të evidentonim prova. Në rastin e Tiranës, jo vetëm që nuk ka godina por as themele apo një gropë të hapur për të nisur ndërtimin e këtij inceneratori. Ndërkohë deri më sot janë dhënë rreth 35 milionë euro për këto katër vite për një incenerator që nuk ekziston. Landfilli i Sharrës ishte landfill dhe ka mbetur i tillë, groposeshin mbetje dhe ende bëhej e njëjta gjë. Nuk ka ndryshuar asnjë gjë”– u shpreh ndër të tjera deputetja demokrate, Ina Zhupa.
