“Jeta ime është një aventurë, kam frikë dhe jam penduar”, ishin këto fjalët e Roxhers Demirazi, shqiptarit të përfshirë në vrasjen 19-vjeçarit në Selanik, vetëm disa orë përpara se t’i dorëzohej policisë shqiptare, e më pas drejtësisë greke.
Shqiptari me zë që i dridhej nga frika e pasojave të krimit makabër të 2 shkurtit, foli për mediat greke ‘Alpha Tv’.
“Pashë lajmet pas ngjarjes dhe u tremba. Do ikte babi me gjyshen në Shqipëri dhe mendova të ikja dhe unë. Nuk kam qenë kurë në një pozitë të tillë dhe as nuk kam dashur, ndaj kisha frikë. Ishte vendimi im, nuk më ndihmoj askush. Babit nuk i tregova asgjë lidhur me këtë kur u nisëm, e mori vesh kur ishin këtej”.
Ai i cilësoi ditët e fundit si “aventurë të frikshme”, ndërsa i kërkoi familjes së tij të qëndrojë e fortë në këtë situatë të pazakontë që ndodhet.
“Kjo që po përjetoj këto ditë është një aventurë për jetën time dhe kam shumë frikë. Nga thellësia e zemrës sime dua të ngushëlloj familjen. Jam penduar. Nëse do të ndryshoja diçka, do të ishte të mos shkoja më në stadium. Familja ime duhet të qëndroj e fortë. Ndihem keq me gjithçka që ndodhi nuk e prisja të merrte përmasa të tilla. Doja që në fillim të kthehesha në Greqi. Tani dua të përballem me drejtësinë. Dua të kërkoj falje nga prindërit e djalit që u vra. Ika në Shqipëri sepse kisha frikë, kam akoma frikë”, tha shqiptari.
Kujtojmë se shqiptari Roxhers Demirazi i përfshirë në vrasjen e 19-vjeçarit në Selanik, i cili u arratis në vendin tonë disa ditë më parë me qëllim shmangien e përballjes së tij me drejtësinë, u vetëdorëzua në policinë e Korçës mesditën e djeshme. Ai kërkoi të transferohej në Selanik, për të treguar gjithçka që ndodhi orët e para të mëngjesit të dy shkurtit.
https://www.youtube.com/watch?v=vbZvrCGfXLw&feature=emb_title
