Dy persona janë arrestuar në Tiranë, pasi janë kapur duke shkëmbyer kokainë.
Policia bën me dije se në pranga kanë rënë shtetasi A.D., 19 vjeç dhe A.P., 62 vjeç, banues të dy në Tiranë.
Ata janë arrestuar në bulevardin “Zhan D’Ark”, në momentin që po shkëmbenin lëndën narkotike me paratë, brenda automjetit të shtetasit A.P..
Sipas policisë, droga sigurohej nga 19 vjeçari në qytetin e Durrësit, i cili më pas ia shiste 62 vjeçarit që më pas bënte shpërndarjen në zonën e Bllokut, në Rrugën e Elbasanit dhe në afërsi të Piramidës, në Tiranë.
“Nga veprimet hetimore ka rezultuar se shtetasi A.D., pasi siguronte sasinë e lëndës narkotike në qytetin e Durrësit, e transportonte atë në Tiranë dhe ia shiste shtetasit A. P., i cili e shpërndante në doza të vogla në zona të ndryshme të Tiranës, kryesisht në zonën e Bllokut, në Rrugën e Elbasanit dhe në afërsi të Piramidës”, njofton policia.
Gjatë këtij operacioni u sekuestruan në cilësinë e provës materiale 570 gramë lëndë e dyshuar narkotike kokainë, dy automjete, katër aparate celulare dhe 889.000 lekë të rinj, që dyshohen se janë përfituar nga ky aktivitet i paligjshëm.
Materialet i kaluan Prokurorisë së Rrethit Gjyqësor Tiranë, për veprime të mëtejshme, për veprën penale “Prodhimi dhe shitja e lëndëve narkotike”, kryer në bashkëpunim, shtuan të njëjtat burime.
