Deputetët e Partisë Demokratike të Lulzim Bashës janë njoftuar për mbledhjen e grupit parlamentar nesër në orën 09:00, pak para nisjes së seancës parlamentare në Kuvend ku pritet të votohet zgjatja e afatit të organeve të Vettingut.
Basha ka marrë këtë vendim me qëllim që të gjithë deputetët e grupit parlamentar të arrijnë në një vendim unanim sa i përket qëndrimit që do të mbajnë gjatë votimit që pritet të mbahet ditën e nesërme për të zgjatur mandatin e organeve të Vettingut deri në vitin 2024. Kujtojmë se ky propozim për zgjatjen e mandatit të Vettingut është bërë nga ana e mazhorancës.
Ditën e djeshme në një deklaratë të përbashkët BE dhe SHBA kanë kërkuar nga deputetët që të votojnë për zgjatjen e mandatit për organet e Vettingut në mënyrë që të hetoheshin më imtësisht prokurorë dhe gjyqtarë që mund të kenë abuzuar me postin e tyre.
Ndërsa së fundmi i pari deputet që ka publikuar qëndrimin e tij, ka qenë Edi Paloka i cili është shprehur se do të votojë kundër kësaj nisme. Dhe shtoi më tej se kushdo që votonte pro i shërbente kryeministrit Edi Rama.
