Një derbi që vlen gjysmëfinalen e Kupës së Shqipërisë. Trajneri Mehmeti karikon Partizanin në vigjilje të ndeshjes së kthimit ndaj Dinamos, ku përballja e parë derbi u mbyll në barazim 1-1. Ai fton tifozët të jenë të pranishëm.
“Derbi të jep shumë entuziazëm, megjithatë duhet të jemi në ekuilibër sepse është një ndeshje specifike kundrejt Dinamos. Jemi munduar që ta përgatisim ndeshjen në mënyrën e duhur, por doja edhe një thirrje për tifozerinë tonë të zjarrtë sepse janë shumë të rëndësishëm dhe ne nuk ia dalim dot pa ta. Gjithmonë tifozeria e kuqe ka bërë maksimumin për këtë skuadër dhe i bej thirrje që nesër të jenë të pranishëm në stadium sepse janë pjesë e pandashme e jona. Do të futemi në fushë për të bërë maksimumin dhe do të duhet të jemi të kujdesshëm dhe të jemi gjatë gjithë kohës në ekuilibër për të bërë maksimumin”.
Më pas trajneri i të kuqve pohoi se Partizani nuk i ka larë duart nga kampionati, premtoi se ekipi do të respektojë çdo kompeticion.
“Nuk jam dakord që në kampionat ne e kemi humbur betejën sepse janë edhe 51 pikë në lojë dhe ne jemi Partizani dhe do ta respektojmë gjatë gjithë kohës kampionatin javë pas jave. Nesër ne do të mendojmë vetëm për ndeshjen e radhës, por jam i bindur që do i respektojmë të dyja kompeticionet si në Kupë ashtu edhe në kampionat. Ne nuk e meritojmë që të jemi këtu dhe i shohim javë pas jave dhe pas çdo ndeshje që ne kryejmë do të shohim dhe objektivin. Nuk mund të flasim për gjëra që për momentin nuk shihen dot përpara”, u shpreh trajneri i të kuqve në konferencën për shtyp.
