Autoritetet ligjzbatuese greke kanë lëshuar një urdhër-arresti ndërkombëtar për shqiptarin Roxhers Demirazi, i cili dyshohet si i përfshirë në vrasjen e Alkis Kampanos, ngjarje e ndodhur në Selanik, pak ditë më parë.
Dyshohet se 20 vjeçari shqiptar, pas krimit, ka ardhur në Shqipëri. Për këtë autoritetet greke i kanë dorëzuar atyre shqiptare edhe kërkesën për arrestimin e Demirazit.
Ministria e Brendshme shqiptare, sipas raportimeve, ka konfirmuar mbërritjen e urdhrit dhe tashmë ka nisur procesi hetimor për gjetjen dhe arrestimin e tij.
Në fakt, hetimet kanë nisur nga pikat kufitare por për momentin nuk ka asnjë informacion se ku mund të ndodhet i kërkuari.
Ndërkohë në Greqi ka nisur gjykimi i 8 të arrestuarve dhe pritet që ai të përfundojë të premten. Tetë personat janë arrestuar të dielën pasi akuzohen si të përfshirë në vrasjen e Alkisit.
Në 24 orët e mëparshme një tjetër person është dorëzuar pranë organeve të akuzës, i cili ishte identifikuar si i përfshirë në vrasje dhe pritet të dalë para gjykatës.
Të gjithë të mësipërmit ndiqen penalisht për vrasje të përbashkët. Mes tyre janë tetë grekë dhe një shqiptar, 20 deri në 25 vjeç.
