Tre persona janë arrestuar nga policia e Durrësit pasi janë ndaluar në një automjet ku u gjetën 7 kg kanabis.
Burime zyrtare bënë me dije se në bazë të informacioneve të marra në rrugë operative se disa shtetas në Qerret, dispononin lëndë narkotike dhe do ta transportonin atë në drejtim të Durrësit, kanë organizuar dhe finalizuar operacionin policor të koduar “Qerreti”, në kuadër të të cilit u bë kapja dhe arrestimi në flagrancë i:
- Marsid Buja, 35 vjeç, banues në Qerret, i dënuar më parë në Itali, për veprën penale “Prodhimi dhe shitja e lëndëve narkotike”;
- Muhamet Balla, 55 vjeç, banues në Qerret, i dënuar më parë në Itali, për veprën penale “Prodhimi dhe shitja e lëndëve narkotike”;
- Pashk Lala, 57 vjeç, banues në Jubë, i dënuar më parë për vjedhje.
Këta shtetas janë kapur në flagrancë në fshatin Qerret, Durrës, duke transportuar me automjet, rreth 7 kilogramë lëndë narkotike të dyshuar cannabis sativa, me qëllim shitjen në qytetin e Durrësit.
Në cilësinë e provës materiale u sekuestrua lënda narkotike, automjeti dhe tre aparate celulare, ndërsa materialet kaluan në Prokurorinë e Rrethit Gjyqësor Durrës, për veprën penale “Prodhimi dhe shitja e narkotikëve” kryer në bashkëpunim, shtuan të njëjtat burime.
