Lulzim Basha ka nisur një fushatë në rrjetet sociale lidhur me kandidatët e caktuar prej tij për Kryebashkiakë në 6 bashkitë ku në 6 mars do të zhvillohen zgjedhjet e pjesshme.
Garuesit e Bashës do të jenë në siglën e PD, e cila konsiderohet e uzurpuar nga Komisioni i Rithemelimit, i cili mbështet kandidatët që do të garojnë në siglën e koalicionit “Shtëpia e Lirisë”.
Në prezantimin që Basha dhe zyra e tij e mediave, i bën kandidatëve mundohet të nxjerrë në pah lidhjen që emrat e kandiduar kanë me komunitetet, ndërsa theksohet se ata janë demokratët e vërtetë që do i shërbejnë qytetarëve.
Për kandidatin e Rrogozhinës, Ferdinand Saraçi, thuhet se ka lindur dhe rritur Gosë të Rrogozhinës. “Pasi ka provuar emigrimin si shumë e shumë banorë të tjerë të Rrogozhinës, prej vitit 2000, Fredi merret me bisnesin e tregtisë së makinerive bujqësore dhe pjesëve të këmbimit. Përfshirjen dhe pjesëmarrjen në politikë për PD Fredi e ka prej shumë vitesh, ndërkohë që prej 2016, ai është zgjedhur Kryetar i Partisë Demokratike dega Rrogozhinë me votën e anëtarësisë. Fredi ka qenë gjithmonë në ndihmë të komunitetit dhe në krah të njerëzve në nevojë, por sidomos gjatë festave fetare dhe gjatë kohës së pandemisë. Ai është krenar për lidhjet e forta që ka me gjithë komunitetin e Rrogozhinës”, thuhet në informacionin e shpërndarë nga Basha.
Në bashkinë e Durrësit, Basha ka vendosur për Luan Hotin, për të cilin thotë se ai ka lindur dhe është rritur në Durrës dhe është baba i dy femijëve, një vajze dhe nje djali.
“I diplomuar në Universitetin e Tiranës për juridik, ai ka mbajtur prej 5 vitesh përgjegjësitë e ndihmësgjyqtarit dhe prej 10 vitesh ka drejtuar Zyrën Përmbarimore në Durrës. Më pas, Luani ka vazhduar si sipërmarrës në drejtimin e zyrës “Hoti Bailiff Service”.
Luani ka punuar fort për Durrësin duke ndjekur nga afër shqetësimet e komunitetit dhe demokratëve durrsakë. Ai është një shembull konkret i ngjitjes së një demokrati në krye të përfaqësimit të demokratëve të Durrësit duke qenë se ka kontribuar prej vitesh si kryetar i Grupseksionit Nr.1, sekretar i Degës së PD-së në Durrës dhe së fundmi edhe kryetar i saj”, thuhet në informacionin e shpërndarë nga Basha.
Ymer Marku, kandidon për Bashkinë e Vorës, ndërsa në informacionin e publikuar nga zyra e mediave pranë Bashës, thuhet se ai është diplomuar tek Universiteti Luigj Gurakuqi Shkodër.
“Lidhjen e drejtpërdrejtë në shërbim të komunitetit e Vorës i ka filluar në vitin 2003 si kryetar i Komunës Bërxullë, ku nën drejtimin e tij u ndërtua Ujësjellësi dhe Kanalizimet për të gjithë zonën dhe u shtruan 95% e rrugëve. Ymeri ka shërbyer edhe 4 vjet si NënKryetar i Bashkisë. Ymeri do jetë gjithmonë në shërbimin të baniorëve të Vorës, me lidhje të drejtpërdrejtë dhe vetëm në shërbim të halleve dhe problemeve të tyre”, thuhet në informacion.
Më herët u publikua edhe slogani dhe posteri i fushatës për kandidatin e Lushnjes, Indrit Sefa, i cili shkruante se “është patriot”.
“Lindur dhe rritur në Lushnje, Endriti është i martuar dhe jeton me gruan dhe vajzën në Lushnje. Ai është me profesion avokat dhe vjen nga një familje patriotike lushnjare, e cila ka dhënë kontributin e saj në momentet më të rëndësishme të formimit të shtetit shqiptar. Nebi Sefa ka qenë një prej nënshkruesve të panvaresise së Shqipërisë në 28 Nëntor 1912, ndërsa në Kongresin e Lushnjes familja Sefa është përfaqësuar nga dy delegatë, Nebi Sefa dhe Jonuz Sefa”, thuhet në informacionin e publikuar lidhur me kandidatin Sefa.
