Një person është plagosur me armë zjarri në Gjirokastër. Autori, sipas policisë, ka qëlluar me armë një qen, por ka plagosur aksidentalisht 68-vjeçarin.
Raportohet se i lënduari është jashtë rrezikut për jetën.
“Rreth orës 10:05, në fshatin Picar-Gjirokastër, shtetasi H.M., 71 vjeç, banues në fshatin Picar, dyshohet se ka qëlluar me armë gjahu qenin e shtetasit S.M., ku për pasojë ka mbetur i dëmtuar lehtë shtetasi S.M., 68 vjeç, banues në fshatin Picar, Gjirokastër. Menjëherë në vendngjarje kanë shkuar shërbimet e Policisë, të cilët bënë të mundur kapjen dhe shoqërimin e autorit në ambientet e Komisariatit të Policisë Gjirokastër”, njoftoi policia.
Në cilësinë e provës materiale u sekuestrua arma e gjahut, ndërsa grupi hetimor ndodhet në vendngjarje dhe po punon për sqarimin e rrethanave të situatës, shtuan të njëjtat burime.
