Ngjarjet kriminale të shtuara në muajin e parë të vitit janë bërë shkak që policia të jetë më vigjilente dukë shtuar patrullat në zonat më problematike, të cilat kanë si qëllim parandalimin e krimeve dhe evidentimin e personave me rrezikshmëri të lartë dhe atyre që lëvizin më armë zjarri.
Zëvëndësdrejtori për Sigurinë Publike, Luigj Vathi, në një intervistë për Ora News tha se vitet e fundit policia është përballur me sofistikimin e krimit ku autorët nuk lënë gjurmë identifikuese.
“Duhet të pranojmë që sot krimi është sofistikuar, ngjarjet i bëjnë me shumë kujdes, i dinë shumë mirë hyrje-daljet e Tiranës që nuk kontrollohen apo nuk mund të kontrollohen nga policia, duke shfrytëzuar makina dhe targa të vjedhura”,- shprehet ai.
Nisur edhe nga shifrat e punonjësve të policisë të përfshirë në ngjarje kriminale, zëvëndësdrejtori u shpreh se po punohet në çdo strukturë për verifikimin e këtyre rasteve.
“Nuk përjashtohen raste të veçanta që mund të kemi dhe persona të tillë por që edhe vetë ne mund ti kemi larguar nga organizata jonë por edhe nga Shërbimi i Kontrollit të Brendshëm në bashkëpunim me ne ka pasur raste që kanë marrë drejtimin e duhur”,- shprehet ai.
Nga fillimi i vitit janë regjitruar një sërë ngjarje të rënda kriminale, ndërsa hetimet kanë mbetur në vëndnumëro për shkak të pamjaftueshmërisë së provave të mbledhura në vendin e krimit.
