Për herë të parë në zgjedhjet e pjesshme vendore të 6 marsit do të garojnë përballë tyre kandidatë që i përkasin të njëjtës parti, pavarësisht procesit se si janë përzgjedhur apo siglës që përfaqësojnë.
Në të 6 bashkitë, ku do të zgjidhen kryebashkiakët, Komisioni i Rithemelimit të PD garon në siglën e koalicionit “Shtëpia e Lirisë”, ndërsa përballë tyre do të jenë kandidatët e përzgjedhur nga Lulzim Basha, si dhe ato të Partisë Socialiste.
E ndërsa “Shtëpia e Lirisë” nis fushatën sot me prezantimin e kandidatëve nga ish-Kryeministri Sali Berisha, i cili zhvillon takimin e parë me elektoratin në Bashkinë e Durrësit, më konkretisht në Sukth, Lulzim Basha vijon takimet e tij me demokratë të Tiranës, edhe pse kryeqyteti nuk zhvillon zgjedhje.
Po kujt ia ka besuar fushatën për 6 Bashkitë kudo të zgjidhen më 6 mars qytetarët e parë, Lulzim Basha?
Mësohet se emrat që do të drejtojnë fushatën e kandidatëve që garojnë në siglën e PD janë Enkelejd Alibeaj, i emëruar nga Basha, si nënkryetar i PD dhe kreu i Grupit Parlamentar. Alibeaj do të drejtojë fushatën në Lushnje dhe Shkodër.
Ndërkohë një tjetër emër që do të drejtojë fushatën e demokratëve është Gazment Bardhi, i cili kryesisht do të përqëndrohet në Durrës, Rrogozhinë dhe Vorë në takimet me elektoratin.
Për Bashkinë e Dibrës, gjithashtu do të jenë të angazhuar Bardhi dhe Alibeaj, të cilët do të ndihmohen edhe nga deputetët e qarkut Kreshnik Çollaku, Xhelal Mziu dhe Dhurata Çupi.
Një tjetër emër që do të angazhohet në fushatë është deputetja Grida Duma, e cila do të angazhohet kryesisht në Rrogozhinë. Gjithashtu deputetja Oriola Pampuri raportohet se do të angazhohet në fushatë për Bashkinë e Rrogozhinës. Ndërkohë që të emëruarit nga Basha, do të kenë edhe suportin e deputetëve apo sekretarëve që mbajnë funksionet në selinë qendrore të PD, e cila sipas Komisionit të Rithemelimit po mbahet peng nga Lulzim Basha.
