Partia Socialiste e ka organizuar fushatën e saj për zgjedhjet e pjesshme vendore të 6 marsit, duke i besuar drejtuesve politikë të qarqeve, të cilët do të ndihmohen edhe nga deputetët në zonat ku do të zgjidhen kryebashkiakët e rinj.
Kështu Erion Veliaj, si drejtues politik i Qarkut të Tiranës, do të jetë i angazhuar në fushatën në Bashkitë Rrogozhinë dhe Vorë, ndërsa në mbështetje të tij do të jenë edhe deputetët socialistë të këtij Qarku.
Në Lushnje, fushata drejtohet nga Taulant Balla, si drejtues politik i Qarkut të Fierit, ndërsa i angazhuar është edhe Erion Braçe.
Në Dibër, fushata do të drejtohet nga Ulsi Manja, por do të ketë edhe suportin e Damian Gjiknurit, sekretarit të Përgjithshëm të PS-së, i cili do të koordinojë të gjithë punën mes të 6 shtabeve që tashmë janë zyrtarizuar.
Në Durrës, fushata e socialistëve i është besuar Ardian Çelës, i cili gjithashtu është drejtues politik, ndërsa Shkodra ka si drejtuese Edona Bilalin. Për Bashkinë e Durrësit pritet një përfshirje në fushatë edhe nga zv.Kryeministri Arben Ahmetaj, i cili drejton edhe procesin e rindërtimit, duke qenë se Durrësi është një nga bashkitë që ka pasur edhe projektet më të shumta në kuadër të rindërtimit.
Më parë, Kryeministri Edi Rama, njëherazi edhe Kryetar i PS, kishte njoftuar se për zgjedhjet e pjesshme vendore nuk do të ketë një angazhim të të gjithë strukturës apo grupit parlamentar socialist, por në grupet e punës do të përfshihen vetëm deputetët, që kanë marrë mandatet në qarqet ku përfshihen bashkitë që do të zgjedhin kryebashkikët e rinj.
