Presidenti Ilir Meta, në një intervistë për Televizionin Shtetëror Shtëtëror të Malit të Zi, RTCG, ka folur për politikën në vend.
Meta shprehet se Lulzim Basha ka marrë vendime të rënda dhe të papranueshme kundër demokracisë dhe votës së lirë.
Intervista e Presidentit Meta për Televizionin Shtetëror të Malit të Zi RTCG:
Gazetarja: Zoti President, edhe vendi juaj përballet me tensioni politike të prekshme, në relacionin pushtet-opozitë, por edhe brenda partisë më të madhe opozitare, Partisë Demokratike. Si reflektohet kjo në rrugën e reformave të vendit dhe të imazhit ndërkombëtar të tij?
Presidenti META: Është për të ardhur keq, sepse Shqipëria ka qenë shumë më përpara Serbisë dhe Malit të Zi për çështjen e integrimit europian. Shqipëria ka firmosur Marrëveshjen e Stabilizim-Asociimit që në vitin 2006, ndërkohë që Mali i Zi dhe Serbia e kanë firmosur pas Shqipërisë, por Mali i Zi i ka çelur negociatat në 2012-n, Serbia në 2014-n dhe Shqipëria ende jo sot!
Ne nuk kemi qenë pjesë e ish-Jugosllavisë. Nuk kemi asnjë problem sikurse kanë pasur vendet e tjera, që kanë dalë nga ish-Jugosllavia. S’kemi pasur asnjë problem siç ka pasur Maqedonia e Veriut me Greqinë për çështjen e emrit.
Kemi pasur vetëm probleme artificiale të brendshme dhe mungesë vullneti për të bërë ato reforma që e çojnë Shqipërinë më shpejt në Bashkimin Europian dhe këtu përgjegjësia nuk është vetëm e njëanshme, pra vetëm e Qeverisë, por për fat të keq, por përgjegjësi të madhe ka edhe lidershipi i opozitës, që ka kryer disa akte të paprecedentë, që kanë dëmtuar shumë demokracinë, shtetin e së drejtës dhe e kanë rrëzuar sistemin e llogaridhënies!
Djegia e mandateve – një veprim i papajtueshëm! Për më shumë se dy vite Shqipëria kishte një parlament njëpartiak, i cili deri në pengesë për të ushtruar pushtetin e gjithëpushtetshëm, kishte Presidentin e Republikës!
Kemi bojkotin nga ana e opozitës të reformës në drejtësi, që ishte reformë shumë e rëndësishme, që ndihmoi kapjen e të gjitha institucioneve të drejtësisë, nga ana e qeverisë!
Kemi moshyrjen në zgjedhjet vendore nga opozita, veprim katastrofik i paprecedent jo vetëm në Europë, por ndoshta edhe në Afrikë, ku vështirë të gjesh një vend ku nuk ka asnjë këshilltar opozita, jo kryetar bashkie, por nuk ka një këshilltar që të bëjë opozitë.
Ndërkohë ne e dimë se sa i rëndësishëm është pushteti vendor në jetën e përditshme për të gjithë qytetarët, që nga fëmijët e çerdheve e deri te të moshuarit!
Për fat të keq kemi edhe një problem brenda Partisë Demokratike apo brenda opozitës, por unë besoj që do të kapërcehet me kohën.
Është e papranueshme që ai lider (Lulzim Basha), i cili ka marrë këto vendime të rënda në gati 6-7 vite, në vend të reflektonte dhe të merrte një ndjenjë përgjegjësie, ka bërë gjithçka për të qëndruar me kokëfortësi për t’iu shmangur votimit demokratik dhe rregullave të partisë së tij.
Kjo nuk është pozitive, por unë mendoj se opozita është në procesin e saj të ridimensionimit dhe vendi ka nevojë për opozitë të vërtetë dhe do ta ketë këtë opozitë shumë shpejt.
