Dëshmitari kryesor i vrasjes së Endri Mustafës vitin e kaluar në shkodër, 15 vjeçari Ergys Malja, është tërhequr nga bashkëpunimi me drejtësinë.
I riu së bashku me Ibrahim Licin, janë marrë të pandehur për akuzën e “Vrasjes me paramendim” ndaj mikut të tyre, Endri Mustafa, ngjarje kjo e ndodhur në muajin Maj 2021 në Shkodër.
Aktualisht kjo dosje penale është çuar në gjykatë por dëshmitari kryesor dhe njëherësh i pandehuri, Ergys Malja, është tërhequr nga rrëfimi i tij, duke pretenduar se gjithçka ka deklaruar për veten dhe Ibrahim Licin në fazën e hetimeve paraprake, ka qënë e pavërtetë.
Vullnetin e tij për tu tërhequr nga dëshmia dhe bashkëpunimi me organet e Drejtësisë, Ergys Malja, e ka shfaqur edhe përballë gjyqtarëve të çështjes. Pavarësisht kësaj situate, dy prokurorët pretendojnë se dy të pandehurit Ergys Malja dhe Ibrahim Lici, kanë marrë pjesë direkt në vrasjen e Endri Mustafës.
Lici vijon të jetë në kërkim nga policia dhe po gjykohet në mungesë. Ai është akuzuar edhe më parë nga prokuroria si pjesë e grupit që vrau dy vëllezërit, Astrit dhe Ibrahim Bilali në Shkodrës por kjo akuzë nuk u provua dhe çështja kundër tij u pushua.
Sipas dosjes hetimore, Ergys Malja, është njeriu që ka nxjerrë nga shtëpia dhe e ka çuar në Livadhe, Endri Mustafën, duke e joshur këtë të fundit se kishte mbjellë një gastër tokë me 150 rrënjë kanabis.
Por sipas këtij dëshmitari, aty në zonën e Livadhes përpara i ka dalë me motor Ibrahim Lici, duke e qëlluar me armë, Mustafën. Ergys Malja, më pas është larguar në shtëpinë e tij, ku dhe ka fjetur gjumë. Por një ditë më pas ka qënë vetë Malja, që ka çuar policinë kriminale, pikërisht në vendin ku ishte fshehur prapa një ferre, trupi i pajetë i Endri Mustafës.
Mustafa është qëlluar me 7 plumba, ku 6 i kanë prekur organet jetësore dhe një plumb e ka pasur në gojë. Në dosje thuhet se, Endri Mustafa, është larguar nga banesa mbrëmjen e 15 majit 2021, rreth orës 22:00. Plot 24 orë më pas bashkëshortja e tij, Ingrid Mustafa, ka bërë kallëzim në polici se 32-vjeçari ishte zhdukur në rrethana të mistershme dhe se personi i vetëm që e kishte thirur dhe nxjerë nga shtëpia, ishte pikërisht, Ergys Malja.
Gruaja ka treguar dhe bisedën e fundit që Endri, kishte bërë me nënën e tij dhe kjo e fundit e kishte paralajmëruar të mos merrej me 15 vjeçarin, duke i kujtuar një bisedë të vjetër që para një viti, se ai kishte treguar që kishte marrë 3 mijë euro, për të nxjerrë në pritë dike tjetër në Shkodër.
/Ora News/
