Personi i arrestuar nga policia e Tiranës, pasi akuzohet se ka tentuar të vrasë me armë zjarri pronarin e një hoteli në kryeqytet është Ervin Selita. 30-vjeçari njihet edhe si reper me emrin “Vinz”.
Sipas një rindërtimi paraprak të ngjarjes pasditen e djeshme, Selita nuk u lejua të futej në hotelin që ndodhet në rrugën “Tre Vëllezërit Kondi” bashkë me partneren nga recepsionistja, pa paraqitur kartat e identitetit.
Konflikti vijoi më tej me një nga pronarët e hotelit dhe nga ana e 30-vjeçarit dyshohet se është qëlluar me armë zjarri.
Pas marrjes së njoftimit për konfliktin, policia ka shkuar në vendngjarje dhe ka arrestuar të riun. Në pranga u vu dhe vajza që ishte me të për moskallëzim krimi.
Policia njoftoi po ashtu se janë shpallur në kërkim për moskallëzim krimi dhe fshehje të provave edhe dy shokët e 30-vjecarit, të cilët akuzohen se i erdhën në ndihmë atij, gjatë konfliktit.
Akuzat
Ervin Selita u arrestua për veprat penale “Vrasja me dashje” mbetur në tentativë, “Mbajtja pa leje dhe prodhimi i armëve, armëve shpërthyese dhe i municionit”, “Shkatërrimi i pronës” dhe “Prishja e qetësisë publike”.
E.D., 30 vjeçe, e cila shoqëronte Ervin Selitën u arrestua për veprën penale “Moskallëzimi i krimit”.
Në kërkim u shpallën: Erion Mici, 26 vjeç, për veprat penale “Përkrahja e autorit të krimit” dhe “Mbajtja pa leje dhe prodhimi i armëve, armëve shpërthyese dhe i municionit” dhe Xhuliano Selita, 23 vjeç, për veprën penale “Moskallëzimi i krimit”.
Lexo edhe:
Tentoi të vriste pronarin e hotelit, zbardhet dëshmia e reperit: U mërzita pasi….
