Lulzim Basha i është përgjigjur deklaratave të ish-kryeministrit Sali Berisha lidhur me kandidatët për zgjedhjet e pjesshme.
Më herët gjatës ditës, Berisha u pyet nga gazetarët në hyrje të Kuvendit për një koment lidhur me emrat e zgjedhur nga Lulzim Basha për të kandiduar në zgjedhjet e pjesshme.
“Komente personale për ta s’kam, kam komentin e përgjithshëm që ata janë faktikisht kandidatë të lul Bravës, s’kanë asgjë lidhje me anëtarësinë, anëtarët e PD kudo që janë kanë kandidatët më të shkëlqyerit dhe të paraqitur para jush tre ditë më parë”, tha Berisha, duke iu referuar kandidatëve që garojnë nën logon e koalicionit “Shtëpia e Lirisë”.
Nga ana tjetër, në një njoftim të zyrës së shtypit pranë Bashës thuhet se “kandidatet e Shtëpisë së Ilirit, nuk mund të përfaqësojnë kurrë demokratët”.
“Berisha u strehua tek Meta për tu mbrojtur nga Non Grata, Meta kërkon të përdorë demokratët për të rritur pazarin tek Rama siç bëri në 2013-n. Të zgjedhësh Berishën e Metën, mban Ramën”, thuhet më tej në reagim.
