Gjatë muajve të fundit kemi dëgjuar shpesh mesazhet e politikanëve drejtuar qytetarëve, duke kërkuar aleancë me to. Kryeministri Edi Rama shfaqet duke kërkuar aleancë me qytetarët, madje duke krijuar edhe platforma online këshillimi. Lulzim Basha po kështu flet për aleanca me qytetarët, për të shembur atë që e konsideron si “trekëndëshi i Bermudës”.
Së fundmi, edhe Gledis Nano, drejtor i Përgjithshëm i Policisë së Shtetit, kërkon aleancë me qytetarët, për të luftuar krimin.
“Policia e Shtetit është angazhuar me të gjithë kapacitetin e saj njerëzor dhe logjistik për t’u përballur dhe për të goditur me vendosmëri krimin e organizuar dhe çdo dukuri, grupim apo ata individë që lidhen ose janë pjesë e integruar e krimit në përgjithësi. Kjo përballje është luftë pa kthim e pa kompromis, për të arritur rezultatin që e presim bashkërisht: një jetë të denjë për të gjithë dhe ndaj të gjithëve.
Një shoqëri e çliruar nga çfarëdolloj paragjykimi apo kompleksiteti është ajo shoqëri që mbetet në çdo kohë e angazhuar përkrah organizatave ligjzbatuese dhe Policisë së Shtetit. Nëse do të besojmë pa mëdyshje tek njëri-tjetri, ju sigurojmë pa asnjë hezitim, se rrugët e krimit do të jenë gjithmonë e më të rrezikuara, pavarësisht se krimi mundohet të gjejë shtigje, forma dhe mënyra më të sofistikuara për të mbijetuar.
Ndaj le të shfaqemi gjithmonë e më të shumtë në numër, duke rritur shkallën e bashkëpunimit të ndërsjellë dhe për rrjedhojë më të bashkuar në kauzën që na përfaqëson bashkërisht, duke i dhënë frymë dhe energji pozitive përmbushjes së qëllimit tonë të përbashkët, me objektiv kryesor mbrojtjen e jetës.
Bashkërisht jemi një forcë madhore që në emër të së drejtës për të ndërtuar jetën që meritojmë, shndërrohemi në një potencial të tillë që dobëson e kthen në rrënojë, çdo portë a strehë ku ka zënë vend pamja më e papranueshme për shoqërinë tonë, kriminaliteti, kjo dukuri të cilën vizioni ynë i përbashkët, nuk do ta njohë dhe ta pranojë si një nga gjymtyrët që kërkon të na zhvendosë drejt së ardhmes”, shprehet Nano në mesazhin e tij.
Në fund të fundit që të kërkosh aleancë apo koalicion me qytetarët për të arritur disa objektiva nuk ka asgjë të keqe. Çështja është se sa mund të përmbushin pritshmëritë e qytetarëve ata që presin apo kërkojnë aleancën, koalicionin apo ndihmën e tyre…
