Gjykata e Durrësit ka vendosur masën e sigurisë “arrest me burg” për Arlen Hasanaj, i akuzuari për vendosjen e tritolit në shtëpinë e Armand Dukës më 24 Janar.
Hasanaj ka dalë sot para Gjykatës në Durrës për masën e sigurisë, teksa gjykata ka pranuar kërkesën e Prokurorisë për të lënë në qeli biznesmenin 34-vjeçar.
Sipas prokurorisë, Hasanaj rezulton me një djegie në dorën djathtë dhe dyshimet janë se 34-vjeçari është djegur gjatë ndezjes së fitilit në momentin para se të hidhte kallëpin e tritolit në portën e jashtme të oborrit të Dukës mbrëmjen 24 janarit në Durrës. Një ekspert i mjekësisë ligjore nga Tirana ka mbërritur në dhomat e paraburgimit ku ka marrë analizat nëse ka gjurmë baruti në dorën e djathtë të Hasanajt.
Prokuroria e rrethit ka kërkuar arrest me burg për 34-vjeçarin dhe vendimi i ekspertit mjeko ligjor është prova kryesore e organit të akuzës për Hasanajn.
Avokati: Hasanaj i pafajshëm
Nga ana tjetër, mbrojta ka kërkuar një masë më të lehtë, duke argumentuar se klienti i tij kishte qenë në një qendër tregtare në Tiranë disa minuta para shpërthimit në shtëpinë e Dukës dhe kjo e përjashton nga fajësia. Sipas avokatit, nuk është Hasanaj autori i vendosjes së lëndës eksplozive.
Avokati i të akuzuarit paralajmëroi se masën e sigurisë arrest në burg do ta apelojë.
“Prova e sjellë nga vetë akuza, pra trafiku i qelizës në rrugë lineare nga Megatexi në hyrje të Durrësit ku provohet që në orën 22:00 i mbrojturi prej meje ka qenë te ura e Dajlanit, në orën 22:00 ka komunikuar në telefonin e tij celular. Në orën 22:02 hyn në rotonton kryesore tëqytetit të Durrësit, merr kthesë. Në orën 22:02 konstatohet pranë lokal Kanon, pret djathtas dhe parkon pranë shtëpisë së vetë në orën 22:03. Ju bëj me dije që në orën 22:03 pamjet filmike te shtëpia e Armand Dukës fiksojnë autorin duke ndezur fitil. Ka ndaluar makinën, ka hapur portbagazhin e pasmë dhe nga aty ka zbarkuar me dru të blera te Megatexi. Ka bërë dy rrugë, është ngjitur sipër, ka zbritur poshtë, ka marrë makinën e gruas e ka sistemuar për parkim, dhe pasi ka bërë këtë veprim ka marrë makinën e vetë e ka parkuar indietro 10 metra më tutje, pamje të fiksuara nga kamerat e lokal Polis dhe Kanon. Ndërkohë, në materialin që sjell organi i akuzës nga pamjet e para ka autorin e ngjarjes në orën 22:00 që është i fiksuar te trotuarin. Në këtë orë merr itinerarin për të kaluar tek tuneli pranë ish-lokalit poshtë shtëpisë së shtetasit M.D. Në orën 22:01 është i fiksuar poshtë shtëpisë së M.D. për drejtimin te shtëpia e Armand Dukës. Në 22:06 autori fiksohet përsëri te Flagship pasi ka kryer aktin kriminal duke ecur për nga pallati fizarmonik. Atëherë si mund të ishte i mbrojturi prej meje që ka hyrë në Durrës në orën 22:02 mund të ishte njëkohësisht edhe tek shtëpia e Armand Dukës. Vetëm Batman e realizon këtë, por ja që organi i akuzës dhe gjykata dhanë një vendim tjetër jo ligjor të radhës siç ndodh rëndom që është edhe e turpshme pasi duan për ta pasur brenda për interesa që dalin përtej interesave ligjore”, u shpreh avokati për mediat pas vendimit të gjykatës.
Duka: S’kam konflikt me të arrestuarin
Vetë Armand Duka ka deklaruar më herët se nuk ka asnjë konflikt me Arlen Hasanajn, madje nuk e njihte fare.
Në prag të zgjedhjeve për kreun e FSHF-së, Armand Duka është përplasur publikisht me kryetarin e Bashkisë Tiranë Erion Veliaj, i cili e ka akuzuar për korrupsion dhe i ka kërkuar të doqëhiqet e të mos rikandidojë sërish për kreun e FSHF-së. Duke nga ana tjetër ka akuzuar për ndërhyrje të politikës në sport.
