Kryesia e PS po zyrtarizon kandidaturat për Kryebashkiakë në 6 njësistë e qeverisjes vendore ku në 6 mars do të mbahen zgjedhjet e pjesshme lokale. Në mbledhjen e sotme u zyrtarizuan emrat për 5 bashki, ndërkohë që për Lushnjen, ende nuk ka një vendim përfundimtar, pasi po vijojnë konsultimet.
Gjithsesi socialistët kanë përcaktuar kandidatët për Bashkitë e Shkodrës, Dibrës, Vorës, Rrogozhinës dhe Durrësit.
Kështu u vendos që në Shkodër në siglën e Partisë Socialiste do të kandidojë për kryetare bashkie prefektja Majlinda Angoni.
Ndërkohë që në Dibër, kryesia e PS-së vendosi që t’i besonte biznesmenit Rahim Spahiu, duke mos vazhduar me kryetarin e komanduar Shkëlqim Murjan.
Emirjana Sako, do të jetë kandidate për kryetare bashkie në zgjedhjet e pjesshme vendore të 6 Marsit. Sekretari i Përgjithshëm i PS Damian Gjiknuri tha se u vendos për pjesën më të madhe të kandidatëve.
“Për bashkinë Durrës rikonfirmojmë Emirjana Sakon e cila ka justifikuar punën e saj dhe do jetë kandidate”, u shpreh Gjiknuri.
Kandidaturat për Bashkinë e Vorës dhe Rrogozhinës u bënë publike nga kryetari i Bashkisë së Tiranës, Erion Veliaj, i cili është edhe drejtues qarku për socalistët.
Në Rrogozhinë për socialistët do të kandidojë Edison Memollës, ndërsa në Vorë kandidat do të jetë Blerim Shera.
“Kemi pasur një diskutim. Janë dy bashki të vogla. Vora ka qenë një bashki që ka qenë herë majtas herë djathtas. Duam që të thellojë rezultatin në favor të PS.
Në Rrogozhinë do vazhdojmë me Edison Memollën. Rrogozhina nuk është pjesa e madhe por edhe pjesa e Spillesë dhe qytetit. Ndaj edhe do të vazhdojmë të mbështesim Edisonin. Ishin dy bashki që janë rikthyer në drejtimin e PS.
Kemi pasur një diskutim më të gjatë në rastin e Vorës. Të treja kanë tipologji të ndryshme. Kemi pasur katër pesë ndërrime drejtuesish. Do të jetë Blerim Shera. E sigurt që ajo do të bëjmë në këto zgjedhje është që do t’i botojmë listat para zgjedhjeve”, u shpreh Veliaj.
Ndërkohë për Lushnjen vendimi do të merret ditën e martë. Kjo të paktën sipas Taulant Ballës, drejtuesi politik i qarkut të Fierit, i cili tha se kandidatët për Lushnjen janë ende në proces konsultimi.
Gjithsesi raportohet se favorite është Eriselda Sefa, e cila aktualisht është e komanduar.
“Të martën në mëngjes do ta keni emrin. Unë jam drejtues politik prej një kohe të shkurtër në Fier dhe do të dua që edhe ky element sociologjik të përdoret edhe në rastin në fjalë. Ka aq shumë kandidatë që kanë hyrë në këtë proces dhe që unë për të qenë i saktë, bashkë me kryesinë e partisë kemi vendosur të përdorim edhe këtë element.
Nuk u përmbyll dot sot, kjo tregon se ky proces nuk është fake, por i vërtetë. Kryetari i ri i bashkisë Lushnje do të jetë një person që ka përgatitjen e duhur për të çuar përpara projekte të mëdha. Kjo zonë është “hambari” i Shqipërisë. PS garon për t’i fituar të gjashta bashkitë”, tha Balla.
