Socialistët kanë përcaktuar 5 nga 6 kandidatët që me 6 mars do të kërkojnë votat e qytetarëve në Shkodër, Durrës, Dibër, Vorë, Rrogozhinë, ndërsa vendimi për Lushnjen pritet të merret ditën e martë, pasi vijon procesi i konsultimeve.
Në dy bashki, atë të Durrësit dhe Rrogozhinës, socialistët kanë vendosur të kandidojnë si Kryebashkiakë, personat që po luajnë rolet e Kryetarëve të Bashkive, si të emëruar. Kështu Emirjana Sako do të garojë për Bashkinë e Durrësit, edhe pse detyra e Kryebashkiakes iu dha, pas dorëheqjes së Valbona Sakos.
Në Rrogozhinë gjithashtu, kandidimi iu besua Edison Memollës, edhe ky i emëruar në këtë pozicion pas ndarjes nga jeta të kryebashkiakut Haxhi Memolla.
Në Shkodër, socialistët ia besojnë prefektes Majlinda Angoni. Kjo e fundit do të garojë me 6 mars duke shpresuar se do të mund të fitojë një nga bastionet e demokratëve dhe të së djathtës në tërësi. Angoni me origjinë shkodrane është prefektë e qarkut të Shkodrës që prej shtatorit të vitit 2020.
Blerim Shera është emri surprizë në radhët e kandidatëve, i cili do të garojë në siglën e PS për bashkinë e Vorës. Ai është psikolog/mësues në shkollën e Vorës ndërsa më herët ka qenë në Yrshek.
Ndërkohë në Dibër kandidat është Rrahim Spahiu, i cili është pjesë e sistemit bankar. Me origjinë nga Dibra, Spahiu jeton prej vitesh në Tiranë, ku edhe ka ndërtuar karrierën profesionale.
