17-vjeçari Florjan Përvathi është lënë në burg nga gjykata në lidhje vrasjen e bashkëfshatarit të tij Lek Lekgjonaj për gjakmarrje.
Avokati i të miturit, Andi Durra menjëherë pas vendimit të gjykatës, në një deklaratë për mediat është shprehur se kjo është një ndër ngjarjet më të rëndë që ka tronditur të gjithë, pasi viktimë sipas tij nuk ishte vetëm 62-vjeçari, por dhe klienti i tij.
Ndër të tjera avokati ka theksuar se faj në lidhje me këtë ngjarje ka i gjithë opinioni publik me nxitjen që bëhet për të marrë hak dhe mbi të gjitha kujdesi i munguar që duhej të kishte 17-vjeçari që në momentin që ai ka ngelur jetim.
“Do të jetë seanca e radhës për vlerësimin e vendimit. Nuk pritej ndonjë vendim tjetër për shkak se është vepër me rrezikshmëri të madhe shoqërore. Është rasti i parë që kemi 2 viktima, një është ai që humbi jetën dhe që ngushëlloj familjarët, dhe viktima e dytë që nuk do të jetë i fundit është dhe autori i veprës penale i cili nuk do të jetë i fundit. Fajtore jemi të gjithë pasi e kemi nxitur nga pak që të kryen kjo vepër penale qoftë duke e quajtur gjakmarrjen si vepër penale qoftë media qoftë opinioni duke i rritur me një urrejtje të tillë. Klienti im është i mitur dhe ishte shumë i tronditur, deklaratën e ka dhënë në polici në prani të psikologut. Është një ndër ngjarjet më të rëndë që ka vetëm viktima. Do të bëj të pamundurën për përfitimet e klienti tim sipas ligjit”, tha avokati.
