Një operacion policor ka nisur mbrëmjen e së martë në Fier, ku po ushtrohen kontrolle në disa prej lokaleve, por edhe në akset rrugore kryesore të qytetit.
Grupe kontrolli të përbëra nga FNSH, struktura e Hetimit në drejtorinë e Policisë Fier, oficerë e agjentë të krimeve në Komisariatin e Policisë Fier dhe patrulla e përgjithshme, janë angazhuar në shumë postblloqe, apo grupe kontrollesh në lokale.
Kontrollet në akset rrugore kryesisht po ushtrohen ndaj automjeteve luksoze dhe ato me targa të huaja.
Nga raportimet mësohet se fokusi është tek kapja e personave në kërkim, atyre që mund të kenë armë zjarri apo atyre që tentojnë të shpërndajnë lëndë narkotike.
