Gazment Bardhi ka reaguar ndaj një sqarimi të Presidentit të Republikës, Ilir Meta, i cili i përgjigjej deklaratave të bëra nga deputeti demokrat në një studio televizive lidhur me caktimin e 6 marsit si datën për mbajtjen e zgjedhjeve të pjesshme lokale.
Bardhi në reagimin e tij e konsideron gjuhën e përdorur nga Meta si të njëjtë me atë të Foltores së ish-Kryeministrit Sali Berisha, duke e cilësuar një gjuhë të padenjë.
“Një sulm më shumë, një sulm më pak nga Ilir Meta nuk ndryshon asgjë në raport me të vërtetën. Presidenti nuk e mbajti premtimin për t’i shkuar deri në fund të vërtetëcs kushtetuese për zgjedhjet lokale të 30 Qershorit 2019. Ai nuk iu drejtua Gjykatës Kushtetuese për të provuar se kishte të drejtë për shtyrjen e zgjedhjeve.
Gjuha e Foltores nuk mund të jetë kurrë gjuhë e institucionit të Presidentit, pavarësisht halleve të përbashkëta të Ilir Metës, Edi Ramës dhe Sali Berishës.
Duke i uruar punë të mbarë Presidentit të Republikës, i sugjeroj lexim të kujdesshëm të vendimit të Gjykatës Kushtetuese”, shkruan Bardhi, duke postuar edhe një pjesë nga vendimi i Kushtetueses mbi zgjedhjet e 30 qershorit, që u bojkotuan nga PD-ja e Lulzim Bashës.
