Deputetja demokrate e Dibrës, Dhurata Çupi, ka publikuar një video në rrjetet sociale, ku shfaqen efektivë të policisë, të cilët kanë bllokuar qarkullimin në rrugën e Arbrit, e inauguruar me pompozitet nga Kryeministri Edi Rama dhe ministrja Belinda Balluku, dy muaj më parë.
Deputetja shkruan se “Rruga e Arbrit” ka dalë sot jashtë funksionit nga bora.
“Rruga u hap për propagandë. Në të vërtetë ajo është e pa mbaruar, prandaj sot shikohet si rrezik për qytetarët dhe bllokohet kalimi me polici si në shtetrrethim.
Mashtrimi i shqiptarëve dhe i dibranëvë zgjati më pak se 2 muaj. Kur rrugët jepen pa garë tek klientët e Edi Ramës, kur kontratat dhe afatet nuk respektohen, korrupsioni është para syve tanë!
Bie pak borë në Shqipëri dhe bllokohet gjithçka. Mbyllen shkollat, mbyllen dhe rrugët. Shteti i korrupsionit që ka ngritur Edi Rama del zbuluar thjesht nga një borë.
Në 6 mars dibranët kanë mundësinë e madhe ta ndëshkojnë me votë këtë qeveri të keqe që i vjedh, i izolon dhe i varfëron.
Dibranëve u duhet një bashki për vete, jo për qeverinë”, shkruan Çupi.
