Deputeti Saimir Korreshi, i cili njëherazi është edhe kreu i degës së PD në Lushnje, ka dalë me një propozim që duket ka kapur të papërgatitur Lulzim Bashën, i cili është shkarkuar si Kryetar i PD nga Kuvendi i 11 dhjetorit 2021, por nuk njeh vendimin as të Kuvendit dhe as të anëtarësisë.
Koreshi u shpreh për Report Tv, se nuk ka demokratë të ndarë dhe se do të mundohen që të nxjerrin një kandidat të përbashkët për PD-në.
Në takimin që po zhvillohet në Lushnjë është diskutuar njëkohësisht për një kandidaturë të përbashkët për zgjedhjet e 6 marsit dhe këtë kandidaturë tha Koreshi t’ua imponojmë drejtuesve të PD-së në Tiranë. Sipas Korreshit, Lushnja do t’i imponohet Tiranës me një kandidat të përbashkët, pasi kështu mund të fitohet bashkia.
‘U takuam për të parë njëri-tjetrin në sy, që të fitojmë bashkinë e Lushnjës. Do mundohemi të nxjerrim kandidat të përbashkët pavarësisht përplasjes Basha-Berisha. Jemi në një mendje për një kandidat, por kemi mendim ndryshe për regjistrimin. Nuk ka demokratë të ndarë. Ne të PD Lushnjë duhet t’i imponohemi Tiranës dhe jo Tirana të na imponohet ne”, u shpreh Korreshi.
Nuk dihet nëse Korreshi dhe dega e PD në Lushnje do të arrijnë të bindin Bashën me këtë propozim, apo deputeti do të ketë fatin e kolegëve të tij dhe do të përjashtohet nga Grupi Parlamentar dhe partia.
