Kryeministri Edi Rama tha këtë të Enjte se deputetët e PS-së nuk do të garojnë në zgjedhjet e pjesshme lokale.
“Kemi folur për të filluar menjëherë nga puna për zgjedhjet lokale, do të respektojmë afatet, nuk mendoj se do të kemi deputetë në këtë garë, ky është mendimi i të gjithë kryesisë”, tha Rama për gazetarët pas mbledhjes së Kryesisë së Partisë Socialiste.
“Sa i takon grave, mes një gruaje dhe 10 burrave, unë do të zgjidhja një grua”, shtoi ai.
I pyetur nëse do u jepet një shans i dytë rikandidimi personave që janë përjashtuar më herët për shkak të dekriminalizimit, Rama tha se PS nuk i jep asnjë personi këtë shans të dytë, që e ka vënë në siklet me njerëzit.
“Shanset e dyta jepen në marrëdhënie individuale, mund t’i japim njëri-tjetrit kur jemi miq dhe për një arsye pse miqësia lëndohet. Shanset e dyta i jep pastaj Zoti, ndërsa Partia Socialiste nuk i jep shans të dytë askujt që e ka vënë në pozitë të vështirë në sytë e njerëzve duke gënjyer, kështu që s’ka shanse të dyta për askënd që bën deklaratë të rreme lidhur me jetën, veprimtarinë e gjithë ato aspekte që kanë të bëjnë me ligjin e pastërtisë së figurave”, tha Rama.
