Jorida Tabaku, kryetare e Komisionit Hetimor Parlamentar për Inceneratorët, akuzoi sot deputetët socialistë se janë shndërruar në mburoja personale ndaj zyrtarëve që janë të përfshirë në aferën kriminale të inceneratorëve.
Tabaku tha se deputetët e PS së Elbasanit u kthyen në mburoja për të mbrojtur aferën e inceneratorit të Elbasanit, prej të cilës Mirel Mërtiti, Klodian Zoto dhe Stela Gugallja, përfituan mbi 20 mln euro përfitime nga buxheti i shtetit.
Sipas Tabakut, deklaratat se pagesat ndaj inceneratorëve po vijojnë sepse çështja mund të shkojë në Arbitrazh, janë thjesht justifikime, pasi kjo është një aferë kriminale, e cila po hetohet nga SPAK, edhe pse para drejtësisë sot është vetëm Lefter Koka, ish-ministër i Mjedisit.
“Pse nuk janë para drejtësisë zv. Kryeministri Arben Ahmetaj, Kryebashkiaku Armando Subashi, kreu i Këshillit të Qarkut të Fierit, Damian Gjiknuri”, u shpreh Tabaku.
Sipas saj, skandali më i madh i inceneratorëve është në Tiranë, ku nuk ka asnjë vendimmarrje institucionale, ndërsa vendimi është dhënë personalisht nga Erion Veliaj, duke shmangur bashkitë e tjera të qarkut të Tiranës, si ajo e Vorës apo e Kamzës.
“Si ka mundësi që kanë vijuar pagesat për këtë incenerator në Tiranë? Të njëjtin fat si Lefter Koka, i cili nuk ka pushtet sot, duhej ta kishte edhe Sekretari i Përgjithshëm i Këshillit të Ministrave, edhe Kryeministri Edi Rama, edhe 3 kryebashkiakët socialistë”, tha Tabaku. Ajo shtoi se çdo dokument dhe konkluzion i Komisionit Hetimor Parlamentar, apo edhe i siguruar nga deputetët e opozitës, do të depozitohet në SPAK.
Tabaku tha se nga informacionet që ka kërkuar në SPAK ka marrë si përgjigje se çështja e inceneratorëve është ende nën hetim, ndërsa shtoi se nuk e kuptonte sepse nuk po përballet me drejtësinë edhe ish-Sekretari i Përgjithshëm i Ministrisë së Mjedisit, sot deputet i PS-së.
“Të gjithë personat e përfshirë në aferën e inceneratorëve duhet të përballen me drejtësinë, pavarësisht statusit apo pozicionit që ato kanë sot. Erion Veliaj, bazuar në shkresat që i ka përcjellë Ministrisë së Mjedisit, merr përsipër të flasë në emër të Qarkut të Tiranës, pa mbledhur as Këshillin Bashkiak dhe as zhvilluar takime me kryebashkiakët e tjerë të Qarkut. SPAK duhet të zbulojë arsyet sepse Erion Veliaj iu përgjigj shkresave personalisht”, tha Tabaku.
