Qeveria ka miratuar në mbledhjen e saj të fundit një vendim, i cili parashikon ngritjen e një strukture që do të vlerësojë nivelin e riskut dhe ngarkesën e stafeve mjekësore. E gjitha kjo ka lidhje me hartimin çdo muaj të listave, ku mjekëve krahas pagës mujore do ti përcaktohen edhe shpërblimet, në varësi të riskut që kanë nga pandemia, por edhe ngarkesës ditore të vizitave.
Gjatë muajve të parë të pandemisë, Kryeministri Edi Rama deklaroi vendosjen e një bonusi mujor prej 1 mijë euro për mjekët që do të ishin në vijën e parë të sulmit, pra në përballjen me atë që e konsideroi si “armiku i padukshëm”, Covid-19.
Vendimi në fjalë krijoi problematika të ndryshme, pasi me mënyrën se si u menaxhua pandemia të gjithë mjekët ishin në vijën e parë të luftës, edhe pse me bonuset e plota u trajtuan ata të spitaleve Covid.
Përmes vendimit të miratuar në mars të 2020, personeli mjekësor, specialistët e shëndetit publik që merren me epidemiologjinë, infermierët dhe specialistët e shërbimit laboratorik të angazhuar në diagnostikimin dhe trajtimin mjekësor të personave të prekur me COVID-19 marrin çdo muaj një bonus në vlerën e 125 mijë lekëve. Prej gati dy vitesh me shpërblim trajtohen edhe personeli mbështetës, i angazhuar në institucionet ku trajtohen pacientët e infektuar, por vlera e çekut për këtë kategori është 65 mijë lekë.
Por, tashmë me ngritjen e strukturës duket se gjithçka do të kalojë në një filtër kontrolli. Kjo strukturë e re, e cila do të nis nga puna këtë muaj, do të përbëhet nga 2 përfaqësues të Ministrisë së Shëndetësisë, 1 përfaqësues nga Instituti i Shëndetit Publik, 1 përfaqësues nga Operatori i Shërbimit të Kujdesit Shëndetësor dhe një përfaqësues nga Fondi i Sigurimit të Detyrueshëm të Kujdesit Shëndetësor.
Vendi po përballet aktualisht me valën Omicron, varianti më përhapës i Covid, por pavarësisht se deri dje në Shqipëri ka rreth 23 mijë pacientë aktivë, nuk ka një fluks shtrimesh në spitale. Kjo pasi vlerësohet se mbi 80 % e të prekurve po përballen me variantin Omicron dhe jo me Delta, i cili ishte më agresiv veçanërisht nëse pacientit i prekeshin mushkëritë.
Studimet e deritanishme tregojnë se Omicron ka një qarkullim më të lartë, por rrezikshmëri më të ulët.
Vendimi
NJË NDRYSHIM NË VENDIMIN NR.207, DATË 10.3.2020, TË KËSHILLIT TË MINISTRAVE, “PËR DHËNIE SHPËRBLIMI PËR PERSONELIN, MJEKË, INFERMIERË DHE PUNONJËS TË TJERË”
Në mbështetje të nenit 100 të Kushtetutës, të neneve 5 e 45, të ligjit nr.9936, datë 26.6.2008, “Për menaxhimin e sistemit buxhetor në Republikën e Shqipërisë”, të ndryshuar, dhe të ligjit nr.115/2021, “Për buxhetin e vitit 2022”, me propozimin e ministrit të Shëndetësisë dhe Mbrojtjes Sociale, Këshilli i Ministrave
V E N D O S I:
Pika 4, e vendimit 207, datë 10.3.2020, të Këshillit të Ministrave, ndryshohet, si më poshtë vijon:
“4. Lista emërore e përfituesve dhe dokumentacioni justifikues, përfshirë ditët e angazhimit, sipas pikave 1, 2 dhe 3, të këtij vendimi, me qëllim përfitimin e shpërblimit, miratohet periodikisht me urdhër të ministrit të Shëndetësisë dhe Mbrojtjes Sociale, bazuar në analizën e shkallës së ngarkesës së veprimtarisë dhe të riskut, që mbart aktiviteti i strukturës shëndetësore, e cila vlerësohet nga sekretariati i ngritur pranë Ministrisë së Shëndetësisë dhe Mbrojtjes Sociale.
Sekretariati përbëhet nga:
a) 2 përfaqësues të Ministrisë së Shëndetësisë dhe Mbrojtjes Sociale;
b 1 përfaqësues i Institutit të Shëndetit Publik;
c) 1 përfaqësues i Operatorit të Shërbimit të Kujdesit Shëndetësor;
ç) 1 përfaqësues i Fondit të Sigurimit të Detyrueshëm të Kujdesit Shëndetësor.”.
Ky vendim hyn në fuqi pas botimit në “Fletoren zyrtare” dhe i fillon efektet nga data 1 janar 2022.
