Nga Boldnews.al
Mbi 100 shtëpi, ku asnjëra nuk i kalonte tre kate, ranën nën këmbët e qindra efektivëve të policisë, bashkiake dhe të rendit që nuk ngurruan të shtynin e palosnin në tokë burra e gra, ashtu si fadroma banesat. Për bashkinë dhe qeverinë është vetëm një statistikë, për banorët e prekur është mundi, djersa, kujtimi dhe shpirti i një jete të vështirë që me shumë përpjekjeu kthye në një banesë. Gati si me gomë lapsi shtëpitë u fshinë nga toka, pasi në truallin e tyre do lartësohen pallate shumëkatëshe dhe qendra biznesi për oligarkinë ende të etur, edhe pse ka përpirë në tetë vite buxhetin e shtetit që majmet me taksat e qytetarëve.
Në emër të strehimit u bë një padrejtësi mbi të drejtën e pasjes së një strehe. Banorët e prekur nga tërmeti do të vendosen në këtë lagje, por me frikën e madhe të një mallkimi që vjen nga lotët e qindra banorëve të tjerë që mbetën pa strehë. Kur vjen fjala për beton dhe kulla, Erion Veliaj merr hov. Është ushqimi i përditshëm për të, është goja që bluan oligarkia e ndërtimit.
Dje ishte akti i fundit i episodit të tragjedisë që po ndodh në lagjen “5 Maji” në Tiranë. Nëpërmjet një vendimi të Këshillit të Ministrave më 2020 dhe me propozim të Bashkisë së Tiranës, u vendos që lagjja e re të ndërtohej në zonën e “5 Majit”. Si për ironi, 5 maji është dita e dëshmorëve, por dëshmorët e ditëve të sotme që u “pushkatuan” pa gjyq dhe u vranë në shpirt janë qindra qytetarë që panë sesi kursimet e 30 viteve të hedhura në ndërtimin e shtëpive të bienin brënda pak minutash.
Dhuna policore nuk mungoi, fyerjet gjithashtu jo dhe mbi të gjitha cinizmi i kreut të bashkisë së Tiranës që zaptoi televizionet duke justifikuar batërdinë që po ndodhte. Nuk është hera e parë që banorët nxirren dhunshëm nga banesat, nuk do të jetë as e fundit, pasi oligarkia e betonit, që ka gjetur një dorë që vetëm firmos e vulos nga dyshja Rama-Veliaj, po bëjnë gosti në qindra milionë euro.
Vetëm emrin e kanë qytetarë, por si të tillë nuk po trajtohen. “Kush tenton të pengojë zhvillimin, do të shoqërohet në polici”-tha Rama, teksa u pyet për tragjedinë që po luhet me regjinë e tij dhe skenarin e Veliajt në lagjen “5 Maji”. Betonieret vetëm gjëmojnë rrugëve të kryeqytetit dhe rrotullojnë betonin që i jep frymë pushtetit, qondror apo lokal në emër të gjoja zhvillimit.
Pushteti u tregon forcën dhe jo arsyen. U kujton dhunën jo vetëm të shpirtit por edhe ata fizike duke i mbajtur gjithnjë të nënshtruar. Nga ana tjetër, kryebashkiaku Erion Veliaj me sytë e errësuar sheh vetëm një realitet: Kulla, qendra biznesi, pallate dhe beton kudo. Asgjë tjetër nuk ekziston për të, duke pasur me vete edhe buldozierin e propagandës ku veten e kthejnë në hero, ndërsa viktimën qytetar në kriminel që “pengon zhvillimin”.
Po kush nga ata banorë mjeranë ka mundësi të blejë apartamente në kullat e oligarkisë? Ndonjë patronazhist e napunës i pushtetit që pati shtëpi në zonën e “5 Majit” me siguri e ka marrë legalizimin dhe po trajtohet ndryshe nga fqinji i tij, edhe pse një gardh i ndan. Mallkimi më i madh që del nga banorët e prekur është që Veliajt t‘i ngrijë betoni në duar. Ndoshta kështu mund të kthehet në një “statujë”, por sërish firmën do e hedhë për leje ndërtimi kullash e vulën do e verë.
