Vetëm gjashtë muaj, kaq zgjati bashkëpunimi i Partizanit me Ergys Kaçen. Ish-mesfushori i Kombëtares, i afruar me bujë gjatë verës së kaluar, ishte shndërruar në barrë për arkat e klubit të kuq.
Paga e lartë dhe rendimenti jo në nivelin e pritur, bën që prej kohësh te Partizani të kërkonin një zgjidhje për prishjen e kontratës me 28-vjeçarin.
Akordi erdhi gjatë kësaj të mërkure, me kryeqytetasit që zyrtarizuan largimin. Në pjesën e parë të sezonit, Kaçe luajti 13 ndeshje me Partizanin, nga të cilat vetëm nëntë si titullar, teksa në fillim të janarit, lojtari u stërvit me ekipin e dytë, pasi nuk pranonte propozimin e klubit për t’u larguar.
