Deputeti i PD, Belind Këlliçi është shprehur se oferta politike e Lulzim Bashës ka skaduar.
Në një intervistë për Ora News, Këlliçi u shpreh se aksioni i Komisionit të Rithemelimit është dimensional, ndërsa shtoi se do riorganizojnë dhe dy organizatat FRPD dhe LDG.
Më tej ai tha se takimet e ish-Kryeministrit Sali Berisha do të vijojnë në 12 qarqet e vendit.
Belind Këlliçi: Basha nuk e gjen veten të përfaqësuar në të gjithë lëvizjen politike dhe në kursin politik që Basha ende tenton të ofrojë. Oferta e tij politike është e skaduar, tashmë e provuar prej 8 vitesh që nuk fiton dot dhe sigurisht qytetarët janë të etur për të pasur opozitë. Aksioni jonë është shumë dimensional. Është që tek kontakti i përditshëm me demokratët, që tek takimet masive. Tek fakti që ne qëndrojmë për të riorganizuar dy organizatat partnere FRPD dhe LDG dhe tek kontakti me qytetarët dhe tek beteja me Edi Ramën. Ne betejën politike e kemi me Ramën por edhe me Lulzim Bashën si mëkëmbës së tij. Takimet e Berishës do të vijojnë në të 12 qarqet e vendit.
Përsa i përket zgjedhjeve të pjesshme në 6 bashki, Këlliçi tha se do të futen në zgjedhje me kandidatura serioze.
Belind Këlliçi: Ka një kërkesë masive për të pasur takime masive, por me një specifikë të rrallë. Duke qenë se ka një moment që i dedikohet bashkive që janë vakante, janë pa kryetar bashkie, mund të ketë një opsion që të shpallet një datë zgjedhjesh dhe të organizohen zgjedhje të pjesshme dhe ne sigurisht do i përgjigjemi nevojës akute që kanë demokratët dhe opozitarët për pasur kandidatura serioze për të rivalizuar drejtuesit lokalë në këto 6 bashki dhe ne do të ofrojmë kandidaturat më të mira, me një proces model.
Më tej ai tha se nuk përjashtohet mundësia për t’u futur në zgjedhje për kryetar bashkie si kandidatë të pavarur.
Belind Këlliçi: Nëse deri në momentin zyrtar të regjistrimit të kandidaturave nuk do të kemi një vendim nga Gjykata e Tiranës, ne do të shohim opsionin për të garuar me kandidatë të pavarur.
