Lulëzim Masha, 63 vjeç, është personi që i shpëtoi atentatit të ndodhur këtë të Martë në zonën e Liqenit të Thatë në kryeqytet.
Ngjarja ka ndodhur tek nënkalimi i Liqenit të Thatë – rruga kur shkon për tek pedonalia e liqenit. Aty dyshohet se një person i paidentifikuar ka qëlluar me pistoletë 3 herë në drejtim të mjetit tip “Benz” me drejtues 63-vjeçarin, administrator i shkollës private “Willson”.
Sipas të dhënave paraprake, autori ka qenë në këmbë kur ka qëlluar me armë dhe është larguar po në këmbë nga vendngjarja. Ndërkohë, Masha raportohet se ka qenë i vetëm në makinë.
Sipas burimeve policore, Lulëzim Masha ka deklaruar para uniformave blu se nuk ka konflikte me askënd.
“Më datë 18.01.2022, te nënkalimi te Liqeni i Thatë, nga një person ende i paidentifikuar, dyshohet se është qëlluar me armë zjarri në drejtim të mjetit me drejtues shtetasin L.M., 63 vjeç. Si pasojë e të shtënave, nuk ka persona të lënduar. Shërbimet e Policisë kanë shkuar menjëherë në vendngjarje, janë ngritur pika kontrolli në të gjitha pikat hyrëse-dalëse të Tiranës me qëllim kapjen e autorit. Ndërkohë, grupi hetimor ndodhet në vendngjarje dhe është duke sekuestruar çdo provë të mundshme materiale që do të shërbejë për identifikimin e autorit të ngjarjes”, njoftoi policia.
