Luan Hoti, i emëruar nga Lulzim Basha, si kryetar i degës së PD të Durrësit, është përfshirë në përplasjet në rradhët e demokratëve, ndërsa i kujton ish-Kryeministrit Sali Berisha se ai dhe familja e tij, janë shpallur “non grata” nga DASH, për korrupsion. Reagimi i Hotit ka ardhur pasi më parë Berisha akuzoi Bashën se ka emëruar në krye të demokratëve në Durrës një emër që ka përfituar nga pushteti i Edi Ramës.
“Sali Berisha nuk më bën dot pis me akuzat e tij të ulëta. Familja ime njihet për integritetin e saj nga të gjithë durrsakët. Familja e Sali Berishës njihet për korrupsion nga të gjithë shqiptarët. Për këtë korrupsion Sali Berisha dhe familja e tij është shpallur non grata nga Shtetet e Bashkuara te Amerikës. Gjithçka thotë dhe bën tani ka lidhje vetëm me këtë përcaktim të SHBA dhe nga masat e tjera që janë paralajmëruar se do të merren dhe nga të cilat ai ka frikë si djalli mga temjani”, thuhet në një reagim të Hotit, të shpërndarë nga zyra e shtypit e Lulzim Bashës, i cili vijon të sillet si kryetar i PD, edhe pse është shkarkuar nga funksionet me vendimin e Kuvendit të 11 dhjetorit dhe ratifikuar nga anëtarësia e demokratëve në referendumin e 18 dhjetorit.
Në reagimin e tij, Hoti shprehet se Sali Berisha le të vazhdojë me shpifjet e tij!
“Ne do të vazhdojmë të nxjerrim PD nga gremina, ku ai po kërkon ta zhysë bashkë me një grup ndjekësish, që nuk duan demokratët e Durrësit, por duan vetëm karrierën e tyre personale.
Ka marrë fund koha, kur PD në Durrës i shërbente nteresave korruptive politike të Sali Berishës apo ndonjë ndjekësi të tij nga halli. Qëllimi ynë është të bejmë një PD më të madhe, që shërben demokratëve dhe shqiptarëve, të cilët duan PD në krye të qeverisë!”, thekson Hoti.
Reagimi i Hotit u bë publik pak minuta pas një tjetër reagimi në emër të Lulzim Bashës, i cili i përgjigjej akuzave të Berishës, lidhur me deklaratat se bashkëshortja e Bashës, ishte e përfshirë në një kompani bastesh, si aksionere.
