Zyra e Kombeve të Bashkuara kundër Drogës dhe Krimit (UNODC) konfirmon atë që është zbuluar prej disa kohësh nga studiues të krimit të organizuar: mafia shqiptare luan një rol parësor në Evropë në trafikun dhe tregtinë e drogës.
Disa shtete anëtare të Bashkimit Evropian vuajnë nga dominimi i mafias shqiptare. Jemi përballë një fenomeni kriminal që vazhdon të rritet dhe të zhvillohet.
Shqiptarët fillimisht kanë punuar për grupe të organizuara kriminale të kombësive të tjera, si italianë, turq, rusë dhe kombësi të tjera.
Sot ata nuk kanë më një rol plotësues, por të barabartë me klanet e tjera që veprojnë në Evropë. Kjo ndodhi sepse krerët e mafias shqiptare janë shumë dinakë dhe inteligjentë, dhe strategjitë dhe metodat e kryerjes së trafikut të drogës i mësuan shumë shpejt nga grupet e ndryshme të organizuara kriminale me të cilat bashkëpunuan.
Kështu ata kanë zhvilluar një kapacitet operacional dhe një potencial investimi ekonomik për t’u bërë të pavarur. Reputacioni i tyre për besueshmërinë dhe kohën e duhur në trafikimin dhe tregtimin e barnave me cilësi të lartë me një çmim shumë konkurrues, në mënyrë të pashmangshme e ka përshpejtuar statusin e tyre si trafikantë droge të klasit të parë.
