Nga data 10 janar deri më 15 janar, janë infektuar me Covid-19 në Shqipëri 11246 qytetarë, bazuar në të dhënat zyrtare të Ministrisë së Shëndetësisë.
Ndërkohë kanë humbur jetën si pasojë e koronavirusit 25 qytetarë. Kjo javë konsiderohet nga ekspertët e shëndetësisë me përhapjen më të lartë të Covid-19, ku gjatë 3 ditëve të fundit janë regjistruar mbi 6 mijë raste.
Shqipëria po përballet me valën Omicron, e cila duket se ka arritur pikun në përhapjen e infeksionit. Ekspertët e shëndetësisë kanë deklaruar se varianti Omicron është më i lehtë se Delta, veçanërisht përsa i takon shtrimeve në spitale apo pacientëve në gjendje të rëndë.
Në të gjithë vendin aktualisht janë 20409 pacientë aktivë me Covid-19, bazuar në shifrat zyrtare, ndërkohë që 9998 persona të prekur ndodhen vetëm në Tiranë. Durrësi, Fieri dhe Elbasani, janë qarqet me numrin më të lartë të personave të prekur me Covid, ndërkohë që Dibra dhe Kukësi janë qarqet më pak të prekura.
Rritja e rasteve të reja ditore lidhet me qarkullimin e Omicron, i cili përhapet shumë më lehtë se variantet e mëparshme të Covid-19, por edhe me festat e fundvitit, si dhe koncertet apo takimet e organizuara, në ditët e fundit të dhjetorit.
Shtimi i rasteve të reja ditore është shoqëruar me një rritje të lehtë të personave të hospitalizuar, ndërsa bazuar në të dhënat e fundit në spitalet Covid po trajtohen 148 pacientë, nga të cilët 17 janë në gjendje të rënduar. Bazuar në të dhënat shëndetësore, pjesa më e madhe e pacientëve të hospitalizuar i përkasin variantit Delta, ndërsa Omicron duket se ka pasur një përhapje të gjerë në dy javët e fundit.
