Këto janë pamjet ekskluzive të kazinosë luksoze të sekuestruar nga policia e Durrësit, e cila rezultoi të ishte një biznes i palicencuar dhe certifikuar nga Agjencia e Monitorimit të Lojërave të Fatit.
Pamjet filmike tregojnë qartë një biznes tashmë të ngritur në ambientet e hotelit “Adritik” dhe gati për tu vënë në punë gjatë këtij fillim viti.
“Ora News” mëson se gjatë ditës së sotme në gjykatën e Durrësit, është zhvilluar seanca për caktimin e masës së sigurisë, ndaj tre personave të arrestuar, menaxhërve të kësaj kazinoje, Muhittin Cenk Omeroglu, Robert Cristian Nicolof dhe 38-vjeçari Sergo Solstev.
Për tre personat prokurorja, Enkelejda Xhengo, i kërkoi gjykatës vleftësimin e ligjshëm të arrestimit të tyre nga policia dhe caktimin e masës “Detyrimit për tu paraqitur në polici”.
Ndërsa gjykata në vendimin e saj miratoi vetëm kërkesën për t’i lënë tre të arrestuarit në “Detyrim paraqitje”, ndërsa arrestimin e kryer nga policia e cilësoi si të paligjshëm.
Ndërsa për këtë çështje vijon të jetë në kërkim, Rovena Zahiri. Kjo e fundit konfirmohet të jetë Anëtare e Këshillit Mbikëqyrës në kompaninë e kazinosë “Adria Entertainment”, ku me 32 për qind të aksioneve është dhe kompania “APEX Holding GmbH”.
Zahiri ende nuk është kapur nga policia e Durrësit, ndërsa emri i saj është lançuar në kërkim policor me afat 1 mujor.
Sipas policisë së Durrësit, anëtarja e Këshillit Mbikëqyrës së kompanisë në fjalë, rezulton të jetë njeriu që ka lidhur një kontratë qiraje me hotel “Adriatik” në plazhin e Durrësit, me qëllim ngritjen e një kazinoje në ambientet e një kati të këtij hoteli.
Ndërsa për këtë aktivitet të paligjshëm janë arrestuar dhe 3 anëtarë të një prej kazinove më të njohura në Tiranë, “Royal Eagle Casino”, të cilët sot u liruan.
Ambientet ku ishte ndërtuar kazinoja i përkasin resortit turistik, Adriatik në Durrës, ndërsa biznesi nga burimet policore mësohet se i përkiste një bashkim kazinosh të njohura në Tiranë si, “Royal Eagle Casino”, “Grand Casino” në të cilën është aksionere “APEX Holding GmbH”.
Gjatë aksionit policor, janë sekuestruar 93 kompjutera kumari, 4 tavolina letre dhe 4 ruleta.
Kazinoja është hapur në kohë rekord duke u bërë gati për në punë,ndërsa i gjithë stafi menaxherial, i përket “Royal Eagle Casino” dhe “Grand Casino” që drejtohet nga kompania “Adria Entertainment”.
