Policia e Shtetit shënon sot 109-vjetorin e krijimit të saj. Në ceremoninë e mbajtur në ambientet e Drejtorisë së Përgjithshme të Policisë së Shtetit, kryepolici Gledis Nano apeloi efektivët të mos shpërdorojnë besimin e qytetarëve, të sillen humanë me ta dhe të ashpër me shkelësit e ligjit.
“Sytë dhe vëmendja e qytetarëve janë më së shumti të drejtuar nga ne duke na qortuar për gabimet dhe duke na motivuar dhe shtyrë për të reflektuar që të bëjmë detyrën sa më mirë që në rrugët e vendit të ketë sa më pak aksidente rrugore, sa më pak krime dhe sa më shumë siguri në shkolla, parqe, lokale, banesa e kudo. Le të punojmë më gjithë mundësitë dhe kapacitetet tona, të mos e shpërdorojmë këtë besim dhe pa dashur të vrasim shpresën e të ardhmes duke treguar neglizhencë apo arrogancë. Është koha të fitojmë sa më shumë vetëbesim që tu ofrojmë qytetarëve në shërbim sa më cilësor, të tregohemi humanë e socialë dhe me kulturë me qytetarët por edhe të vendosur dhe të ashpër me shkelësit e ligjit”, tha ai.
Nano u shpreh se në këtë rrugëtim 109-vjeçar, Policia e Shtetit ka pësuar transformime të mëdha.
Në këtë përvjetor ai kujtoi dhe dëshmorët e rënë në krye të detyrës.
“Në Tiranë dhe disa qarqe të vendit disa rrugë do të pagëzohen me emrat e policëve të rënë në krye të detyrës. Ata do të vijojnë në një mënyrë tjetër komunikimin me qytetarët, i përjetshëm do të jetë kujtimi i tyre”.
