Lulzim Basha vijon propagandën në rrjetet sociale lidhur me protestën e zhvilluar me 8 janar në selinë e kësaj partie nga mijëra demokratë, të cilët u sulmuan me gaz dhe mjete të tjera jo vetëm nga policia e Edi Ramës, por edhe mbështetësit e Lulzim Bashës, që ndodheshin brenda selisë.
Me një stil të ngjashëm me propagandën e Edi Ramës apo Erion Veliajt, Basha në reagimin e tij flet për kriminelë që sulmuan selinë, edhe pse nga rradhët e atyre që ndodheshin në seli nuk janë raportuar as të dëmtuar dhe as të plagosur, ndërkohë që nga rradhët e protestuesve që konsiderohen “kriminelë” janë të paktën 12 të tillë.
“Asnjë demokrat nuk ngriti dorën kundër Partisë Demokratike, vetëm mercenarët dhe kriminelët e thirrur nga Sali Berisha për hallin e tij personal.
Ata dështuan sepse Partia Demokratike qëndroi e vendosur përballë të keqes. Asnjë kriminel nuk e pengon dot luftën tonë kundër korrupsionit, që është armiku numër një i mirëqenies së shqiptarëve”, thuhet në një reagim zyrtar të zyrës së Lulzim Bashës.
