Gjykata e Tiranës vendosi këtë të Mërkurë lirimin nga qelia të gjithë personave të arrestuar lidhur me protestën në Partinë Demokratike. Gjykata dha masa “arrest në shtëpi”, “detyrim paraqitje” dhe për të tjerë vendosi të hetohen në vijim pa asnjë masë sigurimi personal.
Kush ishin të arrestuarit
Pas dhënies së vendimit, në një prononcim për mediat, deputetja demokrate Albana Vokshi saktësoi se 18 protestues janë arrestuar, sipas saj në mënyrë të paligjshme.
Ndërkohë, personat e ndaluar që ndodheshin brenda selisë ishin 11, saktësoi avokati që i mbrojti në seanca.
Policia arrestoi lidhur me protestën edhe pesë shtetas nga Kosova, për të cilët të dyja kampet nuk pohuan se ishin pjesë e tyre. Ndërsa vetë të ndaluarit kanë deklaruar se s’kanë asnjë lidhje me protestën.
Vokshi: Policia u njoftua për persona të armatosur në PD para protestës
Albana Vokshi bëri me dije se para protestës, konkretisht në datë 6 është, denoncuar në polici për persona të armatosur në PD, por nuk është ndërhyrë nga policia.
Edhe Çlirim Gjata u shpreh se “Policia s’ka bërë asgjë për grupin paramilitar brenda PD”.
“Edhe seanca e sotme gjyqësore për masat e sigurisë së 18 protestuesve dëshmoi dhe njëherë se protesta e 8 janarit u thirr paqësore u organizua paqësore dhe ishte paqësorë deri në fund. Të 18 protestuesit u liruan, u vërtetua se arrestimet ishin të paligjshme. Prokuroria dhe policia dështuan të siguronin qoftë një fotografi se përdorën dhunë. Të 18 demokratët janë arrestuar ndaluar dhe shoqëruar shumë larg selisë së PD, pa pasur asnjë fakt, arrestimet janë të paligjshme. Janë bërë me lista të përgatitura dhe të shpërndara nga brenda PD për të cacur në fund skenarin Rama-Basha për të ruajtur karrigen e Bashës”, u shpreh Vokshi.
“Në 6 janar është raportuar në polici për persona të armatosur në PD. Në datë 7 është regjistruar në prokurori si procedim, por nuk është ndërhyre dhe në datë 8 janë përdorur nga Basha për të përdorur dhunë ndaj demokratëve. 18 protestuesit u arrestuan me urdhër politik Rama-Basha. Data 8 vërtetoi se ka një opozitë reale të vendosur”, shtoi deputetja.
“Hetimet duhet të kryhen në mënyrë profesionale për të zbuluar autorët e skenarit të dhunës për të mbajtur në krye të partisë Lulzim Bashën. Raportoi i prokurorisë evidentoi se është bërë një procedim në policinë dixhitale në 6 Janar. Në datë 7 është regjistruar në prokuroi por s’ka pasur asnjë reagim, asnjë kontroll në selinë e PD. Përgjegjësit e vërtetë, urdhëruesit dhe zbatuesit e dhunës duhen zbuluar nga hetimet”, theksoi Albana Vokshi.
Edhe Çlirim Gjata theksoi se problemi qëndron se policia nuk ka ndërhyrë në selinë e PD pavarësisht denoncimeve për persona të armatosur të vendosur aty.
“Në datat 6 e 7 ka pasur informacione në polici, e tha prokurori në seancë, pse nuk ndërhyri policia, kjo është pyetja 1 milion dollarëshe. Ka pasur denoncime me foto, emra dhe s’kanë ndërhyrë. Ky është problemi. Policia s’ka bërë asgjë për grupin paramilitar brenda PD”, u shpreh ai.
Avokati i mbështetësve të Bashës: Asnjë send i kundraligjshëm në PD
Avokati i mbështetësve të Lulzim Bashës që u ndaluan tha se në seancë, se “prokuroria pranoi që s’u gjet asnjë send i kundraligjshëm dhe aq më pak një send shpërthyes në zyrën e PD”.
I pyetur nga gazetarët për 5 personat e arrestuar nga Gjakova, ai tha se “s’kanë qenë kurrë në brendësi të PD”.
“11 kanë qenë të ndaluar që kanë qenë pjesë e mbledhjes nga PD në 8 janar, janë paraqitur funksionet përkatës që kanë në PD”, shtoi ai.
