Lulzim Basha ka thirrur në një takim kryetarët e degëve në atë që e konsideron si Kolegji i Kryetarëve, me qëllim organizimin e strukturave të Partisë Demokratike.
Edhe pse është shkarkuar nga posti i kreut të PD me rreth 44 mijë votat e anëtarëve demokratë apo mbi 4400 delegatë të Kuvendit Kombëtar, Basha nuk njeh asnjë nga vendimet, ndërsa vijon të sillet si drejtues i partisë më të madhe opozitare.
Por në mbledhjen e sotme, drejtues të PD në degët e kësaj partie, i kanë kërkuar të dalë në terren dhe të takohet me demokratët.
Madje sipas raportimeve Bashës i është kërkuar që të nisë tur takimesh dhe të sqarojë vetë strukturat.
“Nuk rrihet më në zyrë, duhet të dilni në terren, takoni demokratët, sqaroni strukturat për atë që po ndodh”, mësohet ti kenë kërkuar Lulzim Bashës, disa nga kryetarët, të cilët deri më sot janë shfaqur si besnikë të tij, por që vazhdimisht ndodhen nën presionin e anëtarësisë.
Nga raportimet mësohet se Basha ka pranuar kërkesën, por pa dhënë specifikisht një datë se kur do të nisë një tur takimesh. Prej 9 shtatorit, datë kur Basha vendosi largimin e ish-Kryeministrit Sali Berisha nga Grupi Parlamentar, të vetmin takim që organizoi ishte në Dibër. Por edhe për këtë takim nuk pati një transmetim live, por materialet u servirën për mediat nga zyra e Bashës. Nuk dihet nëse takimet që ka pohuar se do të nisë do të jenë në formatin e Dibrës ose jo, por deri më tani Lulzim Basha është përballur me kërkesën e demokratëve për tu larguar nga zyra e kreut të PD.
