Lulzim Basha, i shkarkuar nga posti i kreut të PD-së nga Kuvendi i 11 dhjetorit dhe më pas edhe nga referendumi i anëtarësisë më 18 dhjetor 2021, vendosi të përjashtojë përjetësisht nga partia ish-Kryeministrin Sali Berisha.
Për të argumentuar këtë vendim, Basha akuzon Berishën se me protestën e 8 janarit, tentoi të vriste drejtuesit dhe anëtarët e PD që ndodheshin në seli. Dhe bazuar në këtë qëndrim që e shpreh jo vetëm ai publikisht por edhe mbështetës të tij, Basha duket se po justifikon kërkesën që iu drejtua Policisë së Edi Ramës, e stacionuar vetëm pak metra larg selisë së PD, e cila ndërhyri dhunshëm, pa pyetur se në protestën e demokratëve kishte të moshuar, gra apo edhe fëmijë, që kishin shkuar me prindërit.
“Në politikë futemi me vullnetin tonë dhe një nga përpjekjet kryesore të jetës time politike është t’i çliroj shqiptarët nga mentaliteti që të solli ky dhe të hoqi ai. Sali Berisha është përjashtuar me unanimitet nga Kryesia e Partisë Demokratike ditën pasi vendosi të sillej jo si politikan, por si kreu i një organizate kriminale antikombëtare, antiamerikane dhe provoi tentativën e vrasjes të një grupi drejtuesish dhe anëtarësh të Partisë Demokratike në selinë e Partisë Demokratike pasi kishte nisur një fushatë të nxitjes së dhunës, të gjuhës së urrejtjes, të përçarjes së demokratëve për të shkatërruar Partinë Demokratike siç e paralajmëroi vetë që nëse Partia Demokratike nuk do të kthehej në bunker për hallin e tij personal, ai do ta shkatërronte, nuk e meritonte të ekzistonte”, tha Basha në një intervistë për ABC.
