Kompanisë së naftës “Bankers Petrolium Albania” i është pezulluar aktiviteti për ndotje mjedisi me mbetje të rrezikshme.
Po ashtu, “Bankers” është gjobitur me 2 mln lekë.
Inspektorati Kombëtar i Mbrojtjes së Territorit njofton se “në ushtrim të përgjegjësive të veta, IKMT pas ushtrimit të kontrollit në subjektin ‘BANKERS PETROLIUM ALBANIA LTD’ Fier, ka konstatuar që subjekti nuk ka respektuar kushtet e Lejes së Mjedisit për largimin e mbetjeve të rrezikshme dhe si rrjedhojë ka kontaminuar zonën”.
Ndaj subjektit është vendosur masa administrative dënim me gjobë në vlerën 2 000 000 lekë dhe është pezulluar aktiviteti, informon IKMT.
Kompania Bankers Petroleum ka pasur probleme edhe në tregun e tregtimit të naftës me një prej rafinerive në vend. Për konfliktin, Autoriteti i Konkurrencës vendosi të mbajë nën monitorim kompaninë deri në 31 korrik 2022.
Po ashtu, Bankers Petroleum është akuzuar për abuzime të ndryshme me pozitën dominuese në tregun e prodhimit dhe tregtimit të naftës bruto.
