Presidenti Meta ka deklaruar se prej kohësh në Shqipëri po kërkohet një konflikt artificial dhe i përgjakshëm. Gjatë intervistës për TV 21 në Maqedoni kreu i shtetit është ndalur edhe të zhvillimet e fundit në PD, duke u shprehur se kryetari që kontestohet duhet të votëbesohet.
“Ajo që po ndodh në PD është një gjë krejt pa kuptim. Kisha edhe dy pyetje të tjera për ju: Po ajo që ka ndodhur më përparë, cfarë ka qenë? Djegia e mandateve të opozitës? A ka qenë dicka normale apo ka qenë dicka që mund të ndodhë diku…? Cfarë ka qenë mospjesëmarrja në zgjedhjet e pushtetit vendor dhe sot opozita në Shqipëri nuk ka asnjë këshilltar në nivel vendor apo në nivel komunal? Pra ka shumë probleme serioze dhe mendoj se për fat të keq problemi kryesor ka qenë vetë cështja e lidershipit të opozitës që gjithmonë ka marrë vendimet më të gabuara.
Për fat të keq aktualisht është një situatë që nuk e meriton asnjë qytetar në Shqipëri për të parë ato pamje. Asnjë anëtar i Partisë Demokratike, një parti e cila është shumë e rëndësishme për vendin tonë pasi është partia e parë produkt i demokracisë dhe i pluralizmit, por njëkohësisht është forca kryesore lëvizëse për të ndryshuar regjimin komunist, me merita të jashtëzakonshme në proceset demokratizuese, euro-atlantike të Shqipërisë.
Dhe cfarë po ndodh? Po ndodh që nuk asnjë kuptim që në demokraci të injorohet vota. Është gjëja më normale që kur një kryetar kontestohet, ai duhet t’i nënshtrohet një procesi votëbesimi. Duhet të tregojë apo të konfirmojë legjitimitetin e tij, ashtu sikurse një kryeministër, të cilin e kundërshton një pjesë e grupit parlamentar që e ka votuar, që e ka zgjedhur, është i detyruar të rikonfirmohet”, tha presidenti.
