Disa mijëra demokratë janë mbledhur në oborrin e selisë së Partisë Demokratike, atje ku pak minuta para orës 12:00 ka mbërritur edhe ish-Kryeministri Sali Berisha i shoqëruar nga deputetë dhe anëtarët e Komisionit të Rithemelimit.
Berisha është pritur me ovacione dhe brohorima, ndërsa ka kërkuar vetëpërmbajtje.
I pozicionuar në shkallët qendrore të selisë, pak metra larg derës kryesore të selisë, e cila u hap nga anëtarët e PD, që kanë hyrë në katin e parë të godinës, Berisha iu drejtua me një mesazh për vetëpërmbajtje, ndërsa u shpreh se ky është një revolucion paqësor.
“Ju jeni referendarët e lirisë, që sot do të kthejnë bunkerin e Lulzim shpifësirës në shtëpinë e lirisë. Kanë vendosur postoblloqe pas postoblloqesh, Edvin Rama ka që dje që përgatit kurthe pas kurthesh në ndihmë të Lulzim Pengut”, tha Berisha.
Ai tha se Lulzim Basha është i rrethuar nga gardistët me kundragaz, nuk ka asnjë mbledhje në seli.
