Me një gjuhë të ashpër, pa bërë komente lidhur me letrën e europarlamentarëve të PPE, që i kërkon të respektojë vendimet e Kuvendit të 11 dhjetorit dhe referendumit të 18 dhjetorit, dhe në prag të protestës së thirrur nga Komisioni i Rithemelimit, që i kërkon lirimin e selisë pas shkarkimit si kryetar i PD, Lulzim Basha tha se kjo seli nuk është dhe nuk do jetë një han mesjetar ku mund të hynë eksponentë të botës së krimit apo të merret peng nga ish zyrtarë të korruptuar të qeverisjes së PD. Situata është e qartë, përplasje mendimesh po, liri shprehje po.
“Në respekt secilit, përplasje të tjera nga ato që ka ndërmend Berisha nuk ka dhe nuk duhet të ketë. Demokratëve u bëj thirrje të rrinë larg skenarëve të dhunës, sepse edhe tani Berisha po ju mashtron. Ai nesër ka mobilizuar kriminelë dhe trafikantë për dhunë. Kjo është mënyra e tij e vetme, streha e tij e fundit. PD ka marrë masa të përballet dhe t’ju tregojë vendin agresorëve që nuk kanë lidhje me PD. Shqipëria nuk mund të turpërohet me një ngjarje të tillë”, tha Basha.
Duke iu drejtuar kritikëve apo kundërshtarëve të tij, Basha tha se “ju them të qëndrojnë të bashkuar përballë regjimit të Edi ramës, përballë skenarëve te dhunës. Dua të përsëris se nuk jam më i hapur për asgjë me personin e shpallur non-grata”.
“Jam i gatshëm dhe jam i hapur të dëgjoj kritikat, kërkesat dhe propozimet që forcojnë bashkimin tonë dhe shërbejnë për modernizimin e PD-së. Kjo është e ardhmja që PD ka zgjedhur, kjo do jetë e ardhmja e PD-së”, u shpreh Basha.
