Lulzim Basha ka blinduar selinë e PD, pak përpara përfundimit të afatit që iu la nga Komisioni i Rithemelimit, për të dorëzuar zyrën e Kryetarit, pasi shkarkimit që iu bë nga ky post nga Kuvendi i 11 dhjetorit dhe Referendumi i 18 dhjetorit.
Një ditë më parë, përfunduan ndryshimet në fasadën e PD, ku dritaret u mbuluan me logon e kësaj partie, ndërsa janë vendosur kangjella për të mos lejuar hyrjen e anëtarëve, nëse do të tentohet forcërisht marrja e godinës. Gjithashtu edhe dera qendrore e selisë nuk hapet më si më parë, por komandohet nga dikush brenda selisë.
Dhe me këto ndryshime është bërë pothuajse e pamundur hyrja në seli normalisht. Sot fatin për të gjetur derën të mbyllur e kishte Jorida Tabaku, një prej deputeteve që ka qëndruar nv krah të Lulzim Bashës.
Tabaku ka shkuar serbes serbes për të hyrë brenda godinës, por e ka pasur të pamundur pasi dera nuk iu hap. Ajo ka nxjerrë telefonin, për të njoftuar dikë për praninë e saj në derën e jashtme të selisë, pastaj i është mundësuar hyrja.
