Ikona e muzikës pop, Britney Spears dëshiron të shkëpusë çdo marrëdhënie me motrën e saj, Jamie Lynn. Vendimi për ta hequr nga followers-at në Instagram vjen pas akuzave të shumta që këngëtarja ka bërë ndaj familjes së saj.
Pasi gjykata vendosi t’i jepte lirinë e plotë pas 13 vitesh, Spears nuk ka kursyer komentet e ashpra drejtuar prindërve dhe së motrës. Në dëshminë të bërë qershorin e kaluar, Spears tha se nëna, babai dhe motra e saj kishin përfituar të gjithë nga kujdestaria, të cilën e cilësoi si abuzive.
Jamie Lynn mohoi akuzat e së motrës, duke thënë se e kishte “dashur, adhuruar dhe mbështetur” këngëtaren. Por burime pranë këngëtares thanë se ajo ishte shumë e zemëruar ndaj saj që e kishte braktisur plotësisht gjatë betejës për të rifituar lirinë.
