Superliga nuk ka vdekur dhe në vitin 2022 po përgatitet të rilancohet. Kështu pohon gazeta prestigjioze Financial Times, duke theksuar se Real Madrid, Barcelona dhe Juventus, klubet që nuk u tërhoqën pas kërcënimeve nga UEFA, janë gati për t’i dhënë jetë të re projektit të shumëpërfolur.
Presidentët Florentino Perez, Joan Laporta dhe Andrea Agnelli nuk e kanë braktisur kurrë idenë e këtij kompeticioni dhe u takuan gushtin e kaluar për të diskutuar këtë çështje, duke vazhduar më pas me kontakte të mëtejshme që duhet të çojnë në një rezultat në vitin që sapo ka nisur.
Ideja është të rimendohet ngjarja nga një këndvështrim ligjor dhe organizativ. E para për të shmangur veprimet e organeve që mbikëqyrin futbollin si UEFA dhe FIFA dhe e dyta për ta bërë turneun më tërheqës për tifozët.
Këto klube kanë angazhuar edhe kompani të specializuara për marrëdhënie me publikun për ndihmë për të “pastruar” imazhin e tyre pas dështimit të projektit të parë dhe për të krijuar një produkt të tregtueshëm që nuk do të marrë kritika, sikurse ndodhi gjatë vitit që lamë pas.
Pritet që kompania e PR, Flint, me bazë në Londër të angazhohet në një fushatë të madhe që do të nënvizojë pozicionin monopol të UEFA-s, duke përshkruar planet për një Superligë si alternativa e vetme për të shpëtuar botën e futbollit.
